Qalıbek Hakim týraly estelikter jaryqqa shyqty
ALMATY. Qarashanyń 20-sy. QazAqparat /Názıra Eleýhan/ - Qalamger Ábilbashar Іlııasulynyń qurastyrýymen «Qalıbek Hakim týraly estelikter» dep atalatyn kitap jaryqqa shyqty,
dep habarlaıdy QazAqparat.
Atalmysh kitap QR Mádenıet jáne aqparat mınıstrligi Aqparat jáne muraǵat komıtetiniń baǵdarlamasy boıynsha «Bilim» baspasynan basylyp shyqqan.Bul jınaqqa tarıhshy ǵalymdar men Qalıbek Hakimniń uly Hasen Oraltaıdyń jazǵan estelikteri engen.
Qalıbek Raıymbekuly Shyǵys Túrkistan qazaqtarynyń ult-azattyq qozǵalysy basshylarynyń biri bolǵan. 1933 jyly Shyǵys Túrkistan qupııa uıymyn qurýǵa qatysqan. 1940-1946 jyldary Manas-Saýan aýdany halqynyń ult-azattyq kóterilisine basshylyq jasap, Saýan aýdanyn azat etken. 1946 jyly aýdan ákimi bolyp taǵaıyndalǵan. Sol jyly Shyǵys Túrkistan úkimeti «Halyq qaharmany» ataǵyn beredi. Keıin Shyǵys Túrkistan úkimeti kommýnıster qýyrshaǵy ekendigine kózi jetken Qalıbek oǵan baǵynýdan bas tartady. 1951 jyly birinshi aqpanda Qytaı kommýnısteriniń tutqıyl shabýylynan shegingen ol elin bastap, Takla-Makan shólin kesip ótip, Tıbet pen Gımalaı arqyly 1952 jyldyń aıaǵynda Úndistannyń Káshmir aımaǵyna keledi. AQSh elshiligi arqyly BUU-men baılanys ornatyp, Túrkııaǵa kóshýge ruqsat alady. Sońyna ergen 200 tútinnen qalǵan 124 adamdy 1954 jyly 29 shildede Ystambul qalasyna bastap barady. «Ult azattyǵy úshin tar jol, taıǵaq keshýdi bastan ótkergen alashtyń asqaq rýhty uly týraly qalǵan qyzyqty maǵlumattardy osy kitaptan oqysańyzdar bolady», deıdi qurastyrýshy.
