Káletaev: Astana - «Týr de Frans» jeńimpazy atanýǵa úmitkerlerdiń biri
ASTANA. QazAqparat - Qazaqstandyq velosıped sporty federatsııasynyń prezıdenti Darhan Káletaev Astana Pro Team komandasy qatysyp jatqan «Týr de Frans» kópkúndik jarysynyń alǵashqy toǵyz aınalymynyń nátıjesine baılanysty óz pikirin bildirdi. Bul jaıly federatsııanyń baspasóz qyzmetine silteme jasaǵan «QazAqparat» HAA tilshisi habarlaıdy.
«Gran-týrdyń alǵashqy kezeńderinen bastap «astanalyqtar» jalpy eseptegi tartysty sátti qadaǵalaı otyryp, laıyqty kórsetkishter kórsete bildi. Bıylǵy jylǵy «Týr de Franstaǵy» «Astana» komandasynyń quramy erekshe: týrǵa qatysý tarıhymyzda alǵash ret komandanyń jartysy otandyq veloshabandozdarmen tolyqty. Olar - Alekseı Lýtsenko, Andreı Zeıts, Dmıtrıı Grýzdev jáne Baqtııar Qojataev. Mundaı tájirıbe komandanyń birigýine septigin tıgizip, aldaǵy ýaqytta qazaqstandyq shabandozdar basty rolderde óner kórsetedi dep senemiz. Qazir biz toǵyz shabandozdyń árqaısysy óz jumysyn nátıjeli oryndap, jaqsy kórsetkishke qol jetkizýge óz úlesterin qosyp jatqandyǵyn kórip otyrmyz. Máselen, gran-týrlarǵa qatysýda mol tájirıbesi bar Lýtsenko mundaı dárejedegi úlken jarysta ózin jaqsy sezinedi. Qojataev ta gran-týrǵa ekinshi márte qatysyp otyr jáne óz mindetin tamasha oryndap júr», - dedi D.Káletaev.
Onyń aıtýynsha, 5-shi aınalymdaǵy Fabıo Arýdyń jarqyn jeńisi - «Astana» komandasynyń qazirgi ýaqyttaǵy eń úzdik jetistigi.
«Fabıo Arý shydamdylyq tanytyp, márege deıin 2,4 shaqyrym qalǵanda taýǵa órleı otyryp shabýylǵa shyqty, sóıtip qarsylastaryn artta qaldyrdy. Arýdyń bul erligi osy kezeńniń jáne jalpy týrdyń mereıin asyrdy. Keshegi 9-shy kezeń de kóp nárseni sheshti. Qazirgi ýaqytta Fabıo Arý jalpy esepte ekinshi orynǵa kóterildi, al ıAkob Fýlsang 5-inshi orynda. Jalpy aıtqanda, «Astananyń» kórsetkishi komandanyń «Týr de Frans» jeńimpazy atanýǵa úmitkerlerdiń biri ekendigin kórsetti», - dedi D.Káletaev.
Qazaqstandyq velosıped sporty federatsııasynyń basshysy sondaı-aq, komandanyń 8 shildede aıaqtalǵan «Avstrııa týry» kópkúndigine qatysqandyǵyna baǵa berdi.
«Bizdiń sportshylarymyz «Avstrııa týrynyń» alǵashqy kúninde-aq jaqsy kórsetkishterge ıe boldy. Oskar Gatto máre syzyǵyn birinshi bolyp kesip ótti, al Mıgel Anhel Lopes - ekinshi. Ekinshi kezeńde Lopes úshinshi orynǵa ıe boldy. Osylaısha, «Avstrııa týry» «Astana» komandasy úshin Lopestiń jalpy eseptegi úshinshi ornymen aıaqtaldy. Bul jaqsy kórsetkish. «Astana» maýsymnyń birinshi bóligindegi qıyndyqtardy abyroımen eńserdi dep oılaımyn, qazir komandanyń ekinshi tynysy ashylǵan sııaqty», - dep óz oıymen bólisti D.Káletaev.
