Qaldyqtardy ornalastyrý oryndaryna júrgizilgen ǵaryshtyq monıtorıng qandaı nátıje berdi
NUR-SULTAN. QazAqparat – 2020 jyly 1022 ekologııalyq tekserý júrgizildi. Bul týraly Ekologııa, geologııa jáne tabıǵı resýrstar mınıstrliginiń keńeıtilgen alqa májilisinde osy vedomstvonyń vıtse-mınıstri Ahmetjan Pirimqulov málim etti, dep habarlaıdy QazAqparat tilshisi.
«Mınıstrliktiń 2020 jylǵa strategııalyq kórsetkishteri oryndaldy, naqty shyǵaryndylar 2,5 mln tonnany, tógindiler 1,1 mln tonnany qurady. 2020 jyly 1022 ekologııalyq tekserý júrgizildi. Bul ótken jylmen salystyrǵanda eki ese az. Tekserister sanynyń azaıýy eldegi karantındik is-sharalarǵa baılanysty. Bul rette, tekserýlerdiń sapasy jaqsardy», - dedi Pirimqulov.
Onyń aıtýynsha, tekserý nátıjeleri boıynsha 2875 zań buzýshylyq anyqtaldy. Olardy joıý týraly 1966 nusqama berilip, sonyń 1540-y oryndaldy.
«Memleket basshysy 2020 jylǵy 10 shildedegi Úkimettiń keńeıtilgen otyrysynda ruqsat etilmegen qoqys tastaıtyn jerlerdiń sanyn qysqartý boıynsha shara qabyldaýdy tapsyrdy. 2020 jylǵy 20 shildede ruqsat etilmegen úıindiler anyqtalǵan jaǵdaıda, shuǵyl áreket etý úshin «jedel jeli» iske qosyldy. Atalǵan jelige 1 myńnan astam ótinish kelip tústi. Qaldyqtardy ornalastyrý oryndaryna ǵaryshtyq monıtorıng nátıjeleri boıynsha jergilikti atqarýshy organdarmen birlesip, 7 147 qoqys úıindileri joıyldy, bul 80 paıyzdy quraıdy», - dedi vıtse-mınıstr.
