Qaldyqtardy qaıta óńdeý jónindegi memlekettik baǵdarlama kerek - depýtat

NUR-SULTAN. QazAqparat – Qatty turmystyq qaldyqtar polıgondarynyń 82 paıyzy ekologııalyq jáne sanıtarlyq normalarǵa sáıkes kelmeıdi. Bul týraly Senattyń jalpy otyrysynda depýtat Ábdáli Nuralıev aıtty, dep habarlaıdy QazAqparat tilshisi.

Senator qalalardaǵy aýanyń joǵary deńgeıde lastanýy, qatty turmystyq qaldyqtar polıgondarynyń nashar jaǵdaıy jáne jaıylym jerleriniń tozýy máselesine nazar aýdardy.

«Qazirgi ýaqytta elimizdegi bar 3 myńnan astam polıgonda 125 mln tonnadan asa qatty turmystyq qaldyqtar jınalǵan. Bul polıgondardyń 82 paıyzy ekologııalyq jáne sanıtarlyq normalarǵa saı kelmeıdi. «Qazaqstan Ǵarysh Sapary» kompanııasynyń ǵaryshtyq monıtorıngi aıasynda elimizde jyldar boıy zańsyz qoqys oryndarynyń kóbeıýi anyqtaldy, biraq olardy joıý sharalary tolyq sheshimin tappaı otyr», - dedi Ábdáli Nuralıev Úkimet basshysynyń atyna joldaǵan saýalynda.

Sonymen qatar, ol máseleni kórsetip qana qoımaı, olardy sheshýdiń yqtımal joldaryn aıtty.

Senator atap aıtqanda mektepterge ekologııalyq tárbıeni qarqyndy túrde engizýdi, aýanyń tazalyǵyna arnalǵan arnaıy zań jobasy men turmystyq qaldyqtardy qaıta óńdeý jáne joıý jónindegi memlekettik baǵdarlama ázirleýdi usyndy.