Qaldyqtar polıgondarda aldyn ala suryptaýsyz jáne zararsyzdanbaı ornalastyrylýda - N. Qapparov
ASTANA. QazAqparat - Júrgizilgen taldaý elimiz boıynsha turmystyq qatty qaldyqtardyń (TQQ) qalyptasýy kóleminiń boljanǵan ósimin kórsetti.
Bul týraly búgin Úkimet otyrysynda Turmystyq qatty qaldyqtardy basqarý júıesin jańǵyrtý baǵdarlamasynyń jobasyn tanystyrý kezinde QR Qorshaǵan orta jáne sý resýrstary mınıstri Nurlan Qapparov málim etti.
Onyń sózine qaraǵanda, qazirgi kezde Qazaqstanda TQQ sektorynda kúrdeli jaǵdaı qalyptasyp otyr, ıaǵnı qaldyqtar polıgondarda aldyn ala suryptaýsyz jáne zararsyzdanbaı ornalastyrylýda.
Polıgondardyń kópshiliginde qyzmet etý merzimi aıaqtalǵan, sondaı-aq olar sanıtarlyq talaptarǵa sáıkes kelmeı otyr. Buǵan qosa bul jerler topyraq quramyn qalpyna keltirý jumystaryn júrgizýdi qajet etedi.
Qazirgi kezde Qazaqstanda qaldyqtar qalyptasatyn oryndarda TQQ-ny bólek jınaý júıeli deńgeıde iske asyrylmaıdy.
N. Qapparovtyń aıtýynsha, ortasha alǵanda qalyptasqan TQQ kólemindegi ekinshi márte paıdalanýǵa jaramdy materıaldyq resýrstarda jyl saıyn 500 myń tonna qaǵaz ben karton, 300 myń tonna shyny, 200 myń tonna metall, 500 myń tonna plastmass bar. Bul óz kezeginde atalǵan resýrstardy ekinshi ret paıdalanýdaǵy úlken áleýetti baıqatýda.
