Qaldyqsyz óndiristi damytýǵa Astana ákimdigi taǵy bir qadam jasady
ASTANA. QazAqparat - Elordada energııa únemdeý jónindegi keshendi jospardy júzege asyrý aıasynda qatty turmystyq qaldyqtardy bólek jınaýdyń jańa júıesin engizý kózdelgen. Bıyl jeltoqsan aıynda Astana qalasynyń tabıǵı resýrstar jáne tabıǵat paıdalanýdy retteý basqarmasy qala boıynsha 100 jýyq túrli-tústi konteıner ornatpaq, dep habarlady astana.kz.
Belgili bir tústegi konteıner qoqystyń jekelegen túrlerine (plastık, qaǵaz, shyny, aralas qaldyqtar jáne t.b.) arnalady. Bul júıe qala turǵyndaryna jaqsy tanys. Buǵan deıin Astana kóshelerinde energııa únemdeıtin quramynda synap bolatyn shamdardy jınaýǵa arnalǵan qyzǵylt-sary konteınerler ornatylǵan bolatyn. Atalǵan joba jalǵasyn tabady jáne 2017 jylǵa deıin tolyq júzege asyrylady. Qaldyqtardy jınaýdyń jańa júıesin engizý álemniń kóptegen memleketterinde sátti qoldanylyp júrgen qaldyqsyz óndiristi damytý qajettiliginen týyndap otyr. Jınalǵan qatty turmystyq qaldyqtar (plastık, qaǵaz jáne t.b.) jergilikti qoqys óńdeıtin zaýytta qaıta óńdelip, túrli materıaldar jasaý úshin qoldanylmaq.
