Qaldyq sýdan aýlanǵan balyq Kókshetaý jáne Petropavl bazarlarynda satylǵan - prokýratýra

KÓKShETAÝ. QazAqparat – Aqmola oblysy mamandandyrylǵan tabıǵatty qorǵaý prokýratýrasynyń bastamasymen ýákiletti organdar tarapynan brakonerlik faktilerin anyqtaý boıynsha is-sharalar turaqty túrde júrgizilip turady, dep habarlaıdy QazAqparat tilshisi oblystyq prokýratýranyń baspasóz qyzmetine silteme jasap.

Vedomstvonyń málimetinshe, 14 mamyrda tabıǵatty qorǵaý prokýratýrasynyń jáne Aqmola oblysy TJD qyzmetkerleri Zerendi aýdanynyń Myrzakólsor kólinde jalpy uzyndyǵy 5 shaqyrymnan astam balyqshylar aýyn tapty. Aýdaǵy balyq kólge jiberilip, aý joıyldy.

«Atalmysh qaldyq sýdan jınalǵan toǵanda 1972 jyldan bastap Kókshetaý qalasynyń sarqyndy sýy (sharýashylyq-zárnájistik jáne ónerkásiptik sarqyndarynyń) jınalady. Toǵanda tuqy (karp) balyǵy bar. Ony balyqshylar zańsyz aýlap, Kókshetaý jáne Petropavl qalalarynyń bazarlarynda satady.

Osyǵan baılanysty, azamattardy balyq ónimderin satýshylardyń veterınarlyq anyqtamalar men zerthanalyq zertteý aktilerin usynǵannan keıin ǵana satyp alýǵa shaqyramyz», - deıdi Aqmola oblysy prokýratýrasynyń baspasóz qyzmetindegiler.

Aıta ketý kerek, jyl basynan beri polıtsııa qyzmetkerleri jáne Aqmola oblystyq orman sharýashylyǵy jáne janýarlar dúnıesi aýmaqtyq ınspektsııasynyń mamandary ańshylyq erejesin buzǵany úshin 190 tulǵany, al, balyq aýlaý erejesin buzǵany úshin - 272 tulǵany anyqtap, ákimshilik jazaǵa tartty.