Qaldyq problemasyn sheshý úshin ekologııalyq aıyppuldy kóterý qajet - sarapshy
NUR-SULTAN. QazAqparat - Qaldyqtar problemasyn sheshý úshin ekologııalyq aıyppuldy kóterý qajet. Bul týraly BAQ ókilderine suhbat bergen «Ulttyq jol aktıvteriniń sapasy ortalyǵy» sharýashylyq júrgizý quqyǵyndaǵy RMK bas dırektory Zamır Saǵynov aıtty, dep habarlaıdy QazAqparat tilshisi.
«Árıne, qaldyqtardy qurylys barysynda qoldaný qajet. Munan ekologııaǵa da úlken paıda bar. Menińshe, qaldyqtardy saqtaýǵa talapty qatańdatý qajet. Sonda ol qaldyqtardy tegin derlik alýǵa bolar edi. Óıtkeni, biz jol qurylysy barysynda qaldyqtardy qoldana bastasaq boldy, olar (qaldyq shyǵaratyn kásiporyndar) baǵasyn kótere bastaıdy. Tipti qaldyqtar kádimgi shıkizattan da aıtarlyqtaı qymbatqa túse bastaıdy. Sondyqtan qaldyqtardy saqtaǵany úshin úlken ekologııalyq aıyppuldar engizý qajet. Sonda shyǵarýshylarǵa olardy ózinde saqtaǵannan góri qutylǵan tıimdirek bolar edi», - dedi ol.
Onyń dereginshe, búginde Qazaqstanda 8 mlrd tekshe metr qaldyq bar.
«Biz birneshe jyldan beri qurylys barysynda qaldyqtardy qoldanýǵa tyrysyp kelemiz. Jobaǵa engizip, esebin shyǵaryp, qaldyqtardy satyp ala bastasaq, olar birden baǵasyn kóteredi. Sol sebepti mundaı qaldyqtardy satyp alý qymbattaı túsýine oraı memleketke de tıimsiz bolyp shyǵady»,- dedi Zamır Saǵynov.
