Qaldybaı Qazanbaev Almaty qalalyq Máslıhatynyń hatshysy bolyp saılandy
ALMATY. QazAqparat - Almatyda qalalyq Máslıhattyń VI shaqyrylymnyń alǵashqy sessııasy ótti. Jıynǵa qala ákimi Baýyrjan Baıbek qatysty.
Shara barysynda jańadan saılanǵan depýtattarǵa tósbelgiler men jeke qujattar tabystaldy.
Sondaı-aq, Qaldybaı Qazanbaev Máslıhat hatshysy bolyp qaıta saılandy.
Aýmaqtyq saılaý komıssııasynyń basshysy Baqytjan Dospanov atap ótkendeı, depýtattar quramynyń ortasha jasy 48 bolyp otyr. Ótken jylǵy quramnan 4 jasqa jasarǵan.
Máslıhat quramy 65 paıyzǵa jańardy.
«Qalamyzdyń damýyna tyń serpin, jańa ıdeıalar kerek. Alǵash ret máslıhatqa úsh partııa endi. Áıelder sany jeteý. 8 ulttyń ókilderi endi. 30-ǵa tolmaǵan eki depýtat bar. Almaty jastardyń qalasy bolǵan soń, jastardyń kóp bolǵanynan qýanamyz», - dedi óz sózinde B.Baıbek.
Qala basshysy halyq qalaýlylaryna Almatyny damytý úshin áli kóp eńbektený qajettigin basa jetkizdi.
