Qaldyqty qaıta óńdeý jobalary nege baıaý atqarylady — Ekologııa mınıstri túsindirdi

ASTANA. KAZINFORM — QR Ekologııa jáne tabıǵı resýrstar mınıstri Erlan Nysanbaev elimizde ne sebepti qoqysty óńdeý jobalarynyń júzege asýy baıaý júrip jatqanyn túsindirdi.

— Ótken jyly 94 jobany qolǵa alǵanbyz. Sonyń teń jartysyna jýyǵy orta jolda tys qaldy. Onyń birden-bir sebebi kompanııalardyń ózderi ınvestjobalaryn durys jasaı almaýy, ekonomıkasyn eseptep bere almaýy boldy. Ekinshiden, kóptegen kompanııalar tehnıka alamyz degen kompanııa bolatyn. Jobalar ýtıltólemniń aqshasyna iske asyrylatyn bolǵasyn, bizdiń basty talap — ózimizdiń jergilikti avtoónerkásiptiń tehnıkasyn alý. Keıin olar Qytaıdan arzan taptyq degen sekildi usynystar aıtty. Biraq bizdiń shartymyz ózgermedi, — dedi ol Úkimet otyrysynda. 

Mınıstrdiń aıtýynsha, tehnıka alýǵa berilgeli otyrǵan nesıeniń sharty óte qolaıly: 15 jylǵa 3 paıyzben jáne alǵashqy eki jyl kanıkýly bar. 

— Taǵy bir sebebi — ákimdikter tarapynan der kezinde tezdetip jer berilmeýi. Osy sebepti jobalardyń 40 paıyzy júzege aspaı qaldy, — dedi mınıstr.

Sondaı-aq vedomstvo basshysy mundaı jobany qolǵa alýǵa nıetti, biraq qujat jaǵyna shorqaq kásipkerlerge kómek kórsetiletinin aıtty. Dálirek aıtqanda, óńirlerde bıyldan bastap mundaı ár jobaǵa jergilikti ákimdikten bir-bir maman bekitilip, soǵan jaýapty bolady.