Qaldyqty qaıta óńdeý: Bektenov vedomstvolarǵa naqty 5 tapsyrma júktedi

ASTANA. KAZINFORM – QR Premer-mınıstri Oljas Bektenov elimizde turmystyq jáne óndiristik qaldyqtardy qaıta óńdeý jumystaryn tıimdi úılestirý maqsatynda múddeli vedomstvolarǵa 5 naqty tapsyrma berdi.

— Birinshi, Ekologııa mınıstrligine múddeli memlekettik organdarmen birlesip 1 qyrkúıekke deıin qaldyqtardyń barlyq túrin basqarý tujyrymdamasyn ázirleýdi tapsyramyn. Ol qaldyqtardy basqarý protsesterin ortalyqtandyrýǵa, barlyq múddeli taraptardy tartýǵa, tsıfrlyq ekonomıka modelin qurýǵa baǵyttalýǵa tıis. 

Ekinshi, Ekologııa mınıstrligi Ónerkásip qorymen jáne ákimdiktermen birge qaldyqtardy basqarý salasyndaǵy jobalardy iske asyrý jumysyn kúsheıtsin. 3 aı merzimde bekitilgen tizimniń ishinen qarjy bólingen jobalar sanyn keminde 5 esege ulǵaıtý kerek. Óńir ákimdikteri qaldyqtardy suryptaý jáne qaıta óńdeý jónindegi árbir jobaǵa olar iske qosylǵansha tolyq qoldaý kórsetsin. 

Úshinshi, Ekologııa, Energetıka mınıstrlikteri ákimdiktermen birge eki apta merzimde qaldyqtardy energetıkalyq kádege jaratý salasyndaǵy jobalar tizbesin anyqtasyn. Áleýetti ınvestorlardy tartý úshin sáýir aıynda aýktsıon uıymdastyrý kerek. 

Tórtinshi, Ónerkásip jáne Energetıka mınıstrlikterine óndiristik qaldyqtardy qaıta óńdeý boıynsha ónerkásiptik jáne energetıkalyq kásiporyndardy qoldaý men yntalandyrýdyń naqty sharalaryn ázirleýdi tapsyramyn. Bul kómir hımııasy, qurylys materıaldaryn jasaý, jerde sırek kezdesetin materıaldardy alý salalarynda jańa óndirister qurýǵa múmkindik beredi. 

Besinshi, Ekologııa, Ónerkásip, Energetıka jáne Tsıfrlandyrý mınıstrlikteri kommýnaldyq jáne óndiristik qaldyqtardy basqarý, monıtorıng jasaý jáne baqylaý salasynda tsıfrlyq sheshimder ázirleýi qajet, - dedi ol Úkimet otyrysynda. 

Oljas Bektenov bul tapsyrmalardyń oryndalý barysyn baqylaýdy birinshi orynbasary Roman Sklıarǵa tapsyrdy.