Qaldyqtardyń qozǵalysyn baqylaıtyn biryńǵaı tsıfrlyq júıe qurylmaq
ASTANA. KAZINFORM — Elimizde qaldyqtardyń paıda bolýynan bastap, qaıta óńdelýine nemese arnaıy oryndarǵa ornalastyrylýyna deıingi qozǵalysyn baqylaıtyn biryńǵaı tsıfrlyq júıe qurý josparlanyp otyr. Bul týraly Ortalyq kommýnıkatsııalar qyzmetinde ótken baspasóz máslıhatynda Ekologııa jáne tabıǵı resýrstar vıtse-mınıstri Jomart Álıev málimdedi.
Vıtse-mınıstrdiń aıtýynsha, bul jumys 2026–2030 jyldarǵa arnalǵan qaldyqtardyń barlyq túrin basqarý tujyrymdamasy aıasynda júrgizilip jatyr. Qujat Úkimettiń 2025 jylǵy 31 jeltoqsandaǵy № 1201 qaýlysymen bekitilgen.
Jańa platforma qaldyqtardy biryńǵaı júıede esepke alýǵa jáne olardyń qozǵalysyn baqylaýǵa múmkindik beredi. Qaldyqtardyń qaıda jınalǵanyn, qalaı tasymaldanǵanyn jáne qaıda qaıta óńdelgenin nemese ornalastyrylǵanyn qadaǵalaýǵa bolady.
Sonymen qatar qaldyqtardyń ár túrin jınaý, tasymaldaý, suryptaý, qaıta óńdeý, kádege jaratý jáne ornalastyrý tártibin retteıtin jeke erejeler ázirlenedi.
Tujyrymdama aıasynda qaldyqtarǵa tolyq túgendeý júrgizý de kózdelgen. Onyń barysynda buryn esepke alynbaǵan óndiristik, ıesiz qalǵan jáne ótken kezeńderden jınaqtalǵan qaldyqtardyń kólemi, quramy men ornalasqan jeri anyqtalady.
Budan bólek, qaıta óńdelgen shıkizatty óndiriste paıdalanýdy yntalandyrý, osy saladaǵy zańnamany jetildirý jáne qaldyq shyǵarýshylardyń jaýapkershiligin kúsheıtý josparlanǵan.
— Jalpy, qaldyqtardy basqarý salasyn damytý — mınıstrliktiń basym baǵyttarynyń biri. Bul másele turaqty baqylaýda, — dedi Jomart Álıev.
Atalǵan jumystardy úılestirý úshin Ekologııa jáne tabıǵı resýrstar mınıstrligi janynan, «Jasyl Damý» AQ bazasynda Qaldyqtardy basqarý ulttyq ortalyǵy qurylǵan.
Ortalyq memlekettik organdardyń birlesken jumysyn úılestirip, tujyrymdamada kózdelgen sharalardyń oryndalýyn baqylaıdy.
Buǵan deıin qaldyqtardy basqarýdy tsıfrlandyrý jáne qaıta óńdeý júıesin damytý jumystary júrgizilip jatqany habarlanǵan edi.
Sondaı-aq qaldyqtardy basqarý jónindegi ulttyq ortalyq qurý jospary týraly jazǵan edik.