Qaldyqtardy óńdeý salasynda 374 mlrd teńgeniń 68 jobasy maquldandy
ASTANA. KAZINFORM — Qazaqstanda kommýnaldyq qaldyqtardy basqarý salasyn damytý úshin jalpy quny 374 mlrd teńgege jýyq 68 joba maquldandy. Bul týraly Qaldyqtardy basqarý departamentiniń dırektory Rýslan Túkenov Astanada ótip jatqan «Jasyl energııa jáne qaldyqtardy qaıta óńdeý» (GEWR’26) X Eýrazııalyq bıznes-forýmynda málim etti.
Onyń aıtýynsha, kommýnaldyq qaldyqtardy basqarý salasyn damytý maqsatynda 2024 jyldan beri Úkimet jeńildetilgen qarjylandyrý tetigin iske qosty.
— Qazir jalpy quny shamamen 374 mlrd teńgeni quraıtyn 68 joba maquldandy. Olar qaldyqtardy suryptaý men qaıta óńdeý nysandaryn salýǵa, jańǵyrtýǵa, sondaı-aq arnaıy tehnıkany jańartýǵa baǵyttalǵan. Búginde 116 mlrd teńgege 30 joba qarjylandyryldy. Sonyń ishinde 12 joba iske qosyldy, — dedi Rýslan Túkenov.
Onyń sózinshe, mınıstrlik qaldyqtardy basqarýdyń zamanaýı júıesin qalyptastyrý jumysyn kezeń-kezeńimen jalǵastyryp keledi.
Forýmda qaldyqtardy basqarý ınfraqurylymyn damytý, ınvestıtsııa tartý jáne qaıta óńdeý kólemin arttyrý máselesine basymdyq berilip otyrǵany da aıtyldy.
Aıta keteıik, Qazaqstan 2030 jylǵa qaraı turmystyq qaldyqtardy qaıta óńdeý deńgeıin 40%-ǵa deıin arttyrýdy josparlap otyr.
