Qaldyqtardy esepke alý men baqylaý biryńǵaı tsıfrlyq júıege kóshiriledi
ASTANA. KAZINFORM – Qazaqstanda qaldyqtardy basqarýdyń 2026-2030 jyldarǵa arnalǵan jańa tujyrymdamasy iske asyryla bastady. Qujat aıasynda barlyq qaldyq túrlerin túgendeý, tsıfrlyq baqylaýdy kúsheıtý jáne qaıta óńdeý kórsetkishterin arttyrý kózdelgen. Bul týraly Ortalyq kommýnıkatsııalar qyzmetinde ótken brıfıngide QR Ekologııa jáne tabıǵı resýrstar mınıstrligine qarasty Qaldyqtardy basqarý departamentiniń dırektory Rýslan Túkenov málim etti.
Onyń aıtýynsha, Úkimettiń 2025 jylǵy 31 jeltoqsandaǵy qaýlysymen Qazaqstanda qaldyqtardy basqarýdyń 2026-2030 jyldarǵa arnalǵan tujyrymdamasy bekitilgen.
– Qujattyń negizgi maqsaty qaldyqtardy basqarýdyń biryńǵaı ári tsıfrlandyrylǵan júıesin qalyptastyrý bolyp otyr. Tujyrymdama aıasynda 2030 jylǵa deıin radıoaktıvti qaldyqtardy qospaǵanda, qaldyqtardyń barlyq túrine tolyq túgendeý júrgizý josparlanǵan. Budan bólek, óńirlerdegi qaldyqtardyń qozǵalysyn baqylaýǵa arnalǵan aqparattyq júıelerdi biryńǵaı tsıfrlyq platformaǵa biriktirý jumystary júrgizilip jatyr, – dedi Rýslan Túkenov.
Aıta keteıik, buǵan deıin, Prezıdent Іs basqarmasynda qaldyqtardy bólek jınaý júıesi engizilgenin habarlaǵan edik.
