«Qaldyq beredi»: Jelidegi vıdeodan keıin Almatydaǵy mektep ashanasy tekserilip jatyr

ALMATY. KAZINFORM –  Áleýmettik jelilerde Almatydaǵy mektepterdiń biriniń ashanasynda oqýshylarǵa tamaq qaldyqtaryn berip jatyr degen aqparat paıda boldy. 

Almaty qalalyq bilim basqarmasy osyǵan baılanysty túsinik berdi. 

– №67 mektepte tamaqtaný sapasyna qatysty aqparattyń taralýyna baılanysty basqarma beınejazbada baıandalǵan barlyq mán-jaıdy zerdeleý jáne anyqtaý úshin tamaqtaný sapasyn baqylaý jónindegi vedomstvoaralyq toptyń jumys komıssııasy sol jerge ketkenin málimdeıdi, - dep atap ótti basqarmadan.

Barlyq mektepte brakerajdyq komıssııa quryldy, onyń quramyna mektep ákimshiliginiń ókilderi, áleýmettik pedagog, medıtsına qyzmetkeri jáne ata-analar qoǵamynyń músheleri kiredi. Beriletin taǵamdardyń sapasyn tekserýdi brakerajdyq komıssııasy aıyna eki ret, al mekteptiń medıtsına qyzmetkeri kún saıyn júrgizedi. 

– QR Densaýlyq saqtaý mınıstriniń 2022 jylǵy 17 aqpandaǵy buıryǵymen bekitilgen «Qoǵamdyq tamaqtaný obektilerine qoıylatyn sanıtarııalyq-epıdemıologııalyq talaptardyń» 65-tarmaǵyna sáıkes tamaq qaldyqtary shyǵýǵa jaqyn ornalasqan mektep ashanasynyń qosalqy nysanyndaǵy arnaıy orynda jınaqtalýy tıis, - delingen habarlamada. 

Osyǵan deıin Almaty mektepterinde oqýshylarǵa beriletin tegin as mázirine ulttyq taǵamdar engizilýi múmkin ekenin jazǵan bolatynbyz. 

Byltyr Memleket basshysy Qasym-Jomart Toqaev aýyl sharýashylyǵy qyzmetkerleriniń birinshi forýmynda mektep ashanasyndaǵy tamaq sapasyn arttyrý baǵytyndaǵy ustanymdaryn aıtqan edi.