Respýblıkalyq mańyzy bar «Qalbataý–Maıqapshaǵaı» joly ashyldy
SEMEI. KAZINFORM – Memleket basshysy Qasym-Jomart Toqaevtyń tapsyrmasyn oryndaý maqsatynda búgin respýblıkalyq mańyzy bar, uzyndyǵy 415 shaqyrym bolatyn «Qalbataý–Maıqapshaǵaı» avtomobıl jolyn qaıta jańartý boıynsha negizgi qurylys jumystary aıaqtalyp, kólik qozǵalysy ashyldy.
Kúre joldyń ashylý rásimine Abaı oblysynyń ákimi Berik Ýálı, Shyǵys Qazaqstan oblysynyń ákimi Nurymbet Saqtaǵanov, «QazAvtoJol» UK AQ tóraǵasy Darhan Imanashev, Parlament Májilisiniń depýtattary Nurtaı Sabılıanov, Erlan Saırov, Ulyqbek Tumashınov, Rınat Zaıytov, Maqsat Tolyqbaı qatysty.
Aımaq basshysy bul joldyń óńir turǵyndary úshin erekshe mańyzy bar ekenin atap ótti.
— Memleket basshysy Qasym-Jomart Kemeluly Toqaev bıylǵy Qazaqstan halqyna arnaǵan joldaýynda «Óńirlerdiń kólik baılanysyna qatysty máselemen myqtap aınalysý kerek. Bul jóninde qazir kóp aıtylyp júr, sonyń ishinde halyqaralyq forýmdarda da talqylanýda. Іri tranzıttik aımaq sanalatyn Qazaqstan úshin bul baǵyt aıryqsha mańyzdy» dep atap ótken bolatyn. Biz búgin óńirimizdiń ınfraqurylymdyq damýyndaǵy mańyzdy beleske kýá bolyp otyrmyz. Joldyń elimizdiń basty merekesi — Respýblıka kúni qarsańynda paıdalanýǵa berilip otyrǵany oblys jurtshylyǵy úshin qýanyshty jańalyq bolǵanyn aıtýymyz kerek. Óńir turǵyndary bul kúndi kóp kútti. Bul halyqaralyq logıstıkalyq dálizdiń 184 shaqyrymy Abaı oblysy arqyly ótedi. Jarma, Kókpekti, Aqsýat aýdandary jol aýmaǵynda jatyr. Atalmysh baǵyt aımaqtyń ekonomıkalyq turǵydan damýyna, týrıstik aǵynnyń artýyna, óńiraralyq baılanysty jaqsartýǵa septigin tıgizeri anyq. Kólik mınıstrligine, «QazAvtoJol» basshylyǵyna, merdiger kompanııaǵa oblys turǵyndary atynan alǵys bildiremin, — dedi oblys ákimi.
«QazAvtoJol» ulttyq kompanııasynyń basqarma tóraǵasy Darhan Imanashev jobanyń strategııalyq mańyzyna toqtaldy.
«Qalbataý — Maıqapshaǵaı» tasjoly — elimizdiń kólik salasynyń mańyzdy bóligi. Bul jol Qazaqstannyń ortalyq jáne shyǵys óńirlerin Qytaı Halyq Respýblıkasynyń shekarasymen baılanystyrady. Jobanyń júzege asyrylýy tranzıttik áleýetti arttyrýǵa, óńiraralyq jáne halyqaralyq baılanysty nyǵaıtýǵa, jol qozǵalysy qaýipsizdigin qamtamasyz etýge jáne azamattar úshin qolaıly jaǵdaı jasaýǵa múmkindik beredi. Bul — elimizdiń ekonomıkalyq turaqty damýyna baǵyttalǵan jol ınfraqurylymyn jańǵyrtýdyń keń aýqymdy jumysynyń nátıjesi, — dedi ol.
Jol qurylysy Qytaıdyń Eksporttyq-ımporttyq bankiniń qarajaty esebinen jáne respýblıkalyq bıýdjetten qosymsha qarjylandyrý arqyly júzege asyryldy. Joba jalpy uzyndyǵy 415 shaqyrym bolatyn 10 ýchaskeni jáne 2 jol paıdalaný ýchaskesin qamtıdy. Onyń ishinde 184 shaqyrymy — Abaı oblysynyń, 231 shaqyrymy — Shyǵys Qazaqstan oblysynyń aýmaǵynda ornalasqan. Jobany iske asyrý barysynda 8 asfaltbeton zaýyty, 1100 birlik jol-qurylys tehnıkasy, 1800-den astam maman jumyldyryldy. 5 demalys alańy, 37 kópir, 2 jol ótpesi, 349 sý ótkizý qubyry jáne demalys aımaqtarynda 2 sanıtarlyq-gıgıenalyq torap salyndy.
Bıyl Abaı oblysynda kóliktik ınfraqurylymdy damytý baǵytynda aýqymdy jumystar atqarylýda. Jalpy uzyndyǵy 408 shaqyrym bolatyn jergilikti mańyzy bar avtomobıl joldary men eldi meken kóshelerin jóndeýge jáne jobalyq-smetalyq qujattama ázirleýge túrli deńgeıdegi bıýdjetterden qarjy bólindi. Oblystyq mańyzy bar 109 shaqyrym joldyń jeti ýchaskesinde, aýdandyq mańyzy bar 130 shaqyrym joldyń 14 ýchaskesinde jáne «Aýyl — El besigi» baǵdarlamasy aıasynda 63 shaqyrym eldi meken kóshelerinde jóndeý jumystary júrgizilýde. Sondaı-aq Semeı qalasynda 52 kóshe, Kýrchatovta 42 shaqyrym jol qaıta jańartylýda.
