«Qalaı tamaqtanasyń, stýdent?» atty aktsııa barysynda eldegi eń úzdik ýnıversıtettik ashanalar anyqtaldy
ASTANA. Sáýirdiń 14-i. QazAqparat /Jasulan Amanbaıuly/ - Stýdentter «Qalaı tamaqtanasyń, stýdent?» atty aktsııa barysynda eldegi eń úzdik ýnıversıtet ashanalaryn anyqtady.
Bul týraly búgin aktsııanyń bastamashylary - Qazaqstannyń stýdentter alıansy uıymynyń jetekshisi Takan Gızzatov jýrnalıstermen bolǵan kezdesýde málim etti, dep habarlaıdy QazAqparat.
Onyń aıtýynsha, sharany uıymdastyrý barysynda respýblıkadaǵy 76 JOO-nyń tamaqtaný oryndary qaraldy. Aktsııa qorytyndysynda stýdentter ashanalarynyń jaǵdaıy men tamaqtaný talaptary saraptaldy, ashanalar men býfetterdiń reıtıngileri jasaldy.
Saraptamadan bólek, stýdentter arasynda tamaqtaný salasyna qatysty saýalnama júrgizilgen bolatyn. Ol boıynsha jaýap qaıyrǵan stýdentterdiń 32 paıyzy ǵana ashanalarda tamaqtanýǵa materıaldyq jaǵdaıy bar ekendigin kórsetken. Tálimgerlerdiń 39 paıyzy stýdettik býfetter jańa zamanǵy talaptarǵa saı dep kórsetken.
Sonymen eń úzdik úshtikke E. Býketov atyndaǵy Qaraǵandy memleketik ýnıversıteti, Óskemen qalasyndaǵy S. Amanjolov atyndaǵy Shyǵys Qazaqstan memlekettik ýnıversıteti jáne M. Ótemisov atyndaǵy Batys Qazaqstan memlekettik ýnıversıteti endi.
Sondaı-aq QSA músheleri tamaqtaný talaptary tómen JOO-nyń ondyǵyn jasaǵan bolatyn. Aıta ketken jón, bul tizimge Astanadaǵy betke ustar 3 ýnıversıtet kirgen.
