Qalasy las elder reıtıngi: Qazaqstan 115 eldiń ishinde 33-orynda tur
NUR-SULTAN. QazAqparat – Qalasynyń lastaný deńgeıi eń nashar 115 eldiń arasynda túzilgen reıtıngte Qazaqstan 33-orynda tur, dep habarlaıdy QazAqparat tilshisi energyprom.kz-ke silteme jasap.
Elderdiń qalalarynyń lastanýyna oraı túzilgen reıtıngte Qazaqstan álemniń 115 eliniń ishinde 33-orynǵa turaqtaǵan. Lastaný ındeksi – 73,4. Bul rette ındekstiń joǵary bolýy jaǵdaıdyń nashar ekendigin bildiredi. Eń las elder reıtınginiń kóshbasynda Kamerýn, Mońǵolııa jáne Mıanma tur. Al álemdegi eń úzdik kórsetkish, ıaǵnı tazalyǵy jaǵynan joǵary baǵa Fınlıandııaǵa tıesli. Bul eldiń lastaný ındeksi 12,1 ǵana.
Reıtıngke TMD elderiniń ishinde Qazaqstanǵa qaraǵanda lastanýy joǵary elderdiń qatarynda Ázerbaıjan bar. Al Moldova, Ýkraına, Reseı, Armenııa jáne Belarýsta jaǵdaı birshama jaqsy.
Ótken jyldyń 12 aıynyń qorytyndysynda elimizde qorshaǵan ortany qorǵaýǵa baǵyttalǵan kúrdeli ınvestıtsııa kólemi 4,3 paıyzǵa artyp, 16,,9 mlrd teńgege deıin jetti. Salystyrmaly túrde aıtar bolsaq, 2020 jyly sektorǵa salynǵan ınvestıtsııa kólemi 157,1 mlrd teńgeni quraǵan bolatyn.
Óńirler arasynda sektordaǵy kúrdeli ınvestıtsııanyń eń joǵary kólemi Jambyl oblysynda tirkelgen. Óńir sektorǵa 1 jyl burynǵy kólemge qaraǵanda qarjyny 4 esege ulǵaıtyp, 52,8 mlrd teńgege jetkizgen. Sonymen qatar sektorǵa qarjy salýda Nur-Sultan (26 mlrd teńge) men Aqtóbe oblysy (19,8 mlrd teńge) jaqsy kórsetkishke ıe. Úzdik bestik qataryna Atyraý men Shyǵys Qazaqstan oblystary da kiredi. Al Almaty oblysy bir jyldyń ishinde sektorda 579,6 mln teńge jumsasa, Soltústik Qazaqstan oblysy ótken jyly múlde ınvestıtsııa shyǵyndamaǵan.
