Qalashy aýylyndaǵy keleńsiz jaǵdaıdy jete zertteý úshin qurylǵan vedomstvoaralyq jumys tobynyń otyrysy ótti
ASTANA. QazAqparat - Búgin, 28 naýryzda Astanada Qazaqstan Respýblıkasy Premer-mınıstri Serik Ahmetovtiń tapsyrmasymen Qalashy aýylyndaǵy jaǵdaıdy jete zertteý úshin qurylǵan vedomstvoaralyq jumys tobynyń otyrysy ótti.
Otyrys barysynda júrgizilip jatqan zertteýler máseleleri talqylandy, dep habarlaıdy QR QOSRM baspasóz qyzmetinen.
Jumys toby birqatar parametr boıynsha, atap aıtqanda, turǵyn jáne sharýashylyq ǵımarattardyń aýa atmosferasynyń gazdyq quramdaryn, sondaı-aq topyraqtyń, jer qyrtystarynyń, sý túbi shógindileriniń, jer ústi sýlarynyń jáne tehnogendik obektilerdiń mıkroelementtik quramdaryn tolyq zertteý jóninde sheshimder qabyldady.
Esterińizge salaıyq, 19 naýryzda Qalashy aýylynda ótkizgen kóshpeli keńes otyrysy barysynda jumys toby aldaǵy ýaqytta atqaratyn qyzmetiniń basty baǵyttaryn, ol úshin qajetti mamandar men quzyrly uıymdar tizimin anyqtaǵan bolatyn.
Buǵan deıin sanıtarlyq epıdemııalyq qyzmet pen densaýlyq saqtaý salasynyń mamandary adam aǵzasyna áser etetin ártúrli ortalardyń jalpy sany 7 myńnan astam zertteýler ótkizdi. Zertteýler nátıjeleri boıynsha mamandar jergilikti turǵyndar úshin vırýsologııalyq, bakterıologııalyq jáne indettik qaýiptiń joqtyǵyn málimdedi.
Jumysqa atom ónerkásibi, geologııa, ǵylymı medıtsına, radıatsııalyq jáne bıohımııalyq zertteýler júrgizetin mamandar tartyldy.
