Kalashnıkov artynan AK-47 qarýyn qurastyrǵany úshin ókinish hat qaldyrǵan
ASTANA. 13 qańtar. QazAqparat - AK-47 avtomatyn qurastyrýshy Mıhaıl Kalashnıkov qaıtys bolar aldynda jarty jyl buryn patrıarh Kırıllge ókinish hatyn jazyp ketken Bul týraly «Izvestııa» basylymy habarlady.
Hatta konstrýktor ózi jasap shyǵarǵan avtomattan ajal qushqan adamdardyń qanyn arqalaý oǵan aýyr júk bolyp júrgenin, soǵan qatysty jan kúızelisimen, kúdikterimen bólisken. Patrıarh Kırılldiń baspasóz hatshysy Aleksandr Volkovtyń sózine qaraǵanda, Kalashnıkovtyń hatyn patrıarh oqyp shyqqannan keıin, ol tanymal konstrýktorǵa jaýap jazyp, onyń ustanymy úshin alǵysyn bildirgen. Kalashnıkov avtomaty 1947 jyly qurastyrylǵan bolatyn. Shamamen álemde 100 mıllıonǵa jýyq AK qarýy nemese onyń kóshirmesi bar kórinedi. Búginde AK 100-den astam eldiń qarýly kúshterinde paıdalanylýda, sondaı-aq ol HH ǵasyrdyń úzdik óner tabysy tizimine endi. Mıhaıl Kalashnıkov 2013 jyldyń 23 jeltoqsanynda ómirden ozdy.
