Qalanyń shet aýdandarynda turǵyndardyń 25% turady – Altaı Kólginov

«Elbasy «Nur Otan» partııasynyń XVIII sezinde elordanyń shet aımaqtaryn damytý boıynsha tapsyrma berdi. Bizdiń qalada 16 turǵyn úı alaby bar. Onda 280 myń adam turady. Bul qala turǵyndarynyń 25 % quraıdy. Memleket basshysy Qasym-Jomart Toqaev qalanyń shet aýdandaryn damytýdy tapsyrdy. Úsh jyldyq kezeńge nysandardyń tizimi ázirlendi. Osy boıynsha jumys jasaımyz», - dedi A. Kólginov.

Qala ákimi shet aýdandardyń túıitkildi máseleleri 3 negizgi blokqa bólingenin atady. Bul jol jáne ınjenerlik ınfraqurylym, áleýmettik nysandardyń azdyǵy, abattandyrý máseleleri.

Turǵyndar kóshege jaryq ornatý, jol jáne jaıaý júrginshiler úshin trotýarlar salý, ortalyq sý qubyryn tartý, jylý berý máselesin sheshý, kanalızatsııa júıesin qurý máselelerin kóterdi. Elorda ákimimen kezdesý barysynda turǵyndar osy aýmaqta turatyn azamattardyń esh jumysty jatyrqamaı, eńbekke jaqyn ekenin aıtty.

«Biz osy jerde týyp-óstik, bilim aldyq. Turyp jatqan aýdanymyzda ómir súrýge qolaıly jaǵdaı jasalsa deımiz. Bul jerde naǵyz eńbeksúıgish azamattar turyp jatyr», - dedi turǵyndar.

Qalanyń shetkeri aımaqtarynyń basty problemalarynyń biri – turǵyndardyń 30 % ortalyq sý qubyry joq. Óndiris, Mıchýrıno, Internatsıonalnyı, Kóktal, Prıgorodnyı, Jeleznodorojnyı turǵyn úı alaptarynyń turǵyndary kolonkalardan sý alady. Buǵan qosa, 698 kósheniń 245-i tas tóselmegen.

Abattandyrý boıynsha bıylǵy jyly 6 balalar alańynyń qurylysy júrýde, aǵash otyrǵyzý, jyly aıaldamalar salý jáne gúlzarlar salý jumystary júrgizilýde. Jyldyń sońyna deıin 42 kósheni jaryqtandyrý, 5 aýlany abattandyrý sharalary aıaqtalady.

Ilınka jáne Lesozavodtaǵy úsh aýysymda oqıtyn eki mekteptiń máselesin sheshý úshin jobalaý jumystary bastaldy.

Qalanyń shet aımaqtaryn damytý baǵyty aǵymdaǵy jyly shilde aıynyń sońynda Premer-Mınıstrdiń tóraǵalyǵymen ótken Memlekettik komıssııa otyrysynda bekitildi. Osylaısha, Altaı Kólginov bir aı ishinde 9 turǵyn úı alabyn aralady.