Qalanyń sáýlet jáne qurylys tehnologııasyna qazirgi zamanǵy ádisterdi paıdalaný qajet - Ahmetjan Esimov
ALMATY. 12 tamyz. QazAqparat /Erlik Erjanuly/ - Ótken ǵasyrdyń 50-80 jyldary salynǵan turǵyn úı qoryn tolyq modernızatsııalaý qajet.
Ony qala ákimi Ahmetjan Esimov búgin tamyz aıynyń 2-jeksenbisinde atap ótiletin Qurylysshy kúnine oraı ótkizilgen saltanatty jıynda aıtty.
«Qazaqstan Táýelsizdiginiń 20 jyldyǵyna oraı bıyl metronyń birinshi kezegin paıdalanýǵa berý josparlanyp otyr. Respýblıka saraıy da kúrdeli jóndeý jumystarynan keıin óz jumysyn qaıta jalǵastyratyn bolady. Qala qurylysy máselesinde shahardyń tarıhı bóligin barynsha saqtap, Ǵylym akademııasy sııaqty kóne ǵımarattardy qaıta jaraqtandyrǵan abzal. Qazir 22 bilim men densaýlyq saqtaý nysanynyń qurylysy júrip jatyr. Sondaı-aq 6 jol aıryqtary men Rysqulov kóshesin 2-JEO-ǵa deıin, Momyshuly kóshesin Shamalǵan kúre jolyna deıin jetkizý, Balýan Sholaq atyndaǵy sport saraıynyń ekinshi kezeginiń, shańǵymen tuǵyrdan sekirý kesheniniń oqý - jattyǵý bazasynyń qurylysyn aıaqtaý josparlanýda»,- dedi Ahmetjan Smaǵululy. Almaty syndy asa iri megapolıste qurylys salasynyń qanshalyqty zor mánge ıe ekendigin atap kórsetken qala basshysy sáýlet pen qurylys tehnologııasynda qazirgi zamanǵa saı ádisterdi keńinen paıdalaný qajettigine erekshe toqtaldy. Qala landshaftaryn burynǵydan da kórkeıte túsý úshin sáýletshiler men músinshilerdi kishi sáýlet túrlerin jetildire túsýge shaqyrdy. Sondaı-aq qurylys kompanııalarynyń erekshe kózge túsken qyzmetkerlerin Qurmet gramotalarymen marapattady.
