Qalanyń bas josparyna baǵynbaǵan qurylys kompanııalaryn jazalaý qajet - sáýletshi
NUR-SULTAN. QazAqparat – Qurylys kompanııalary qalanyń bas josparyna baǵynbaıdy. Bul máseleni sáýlet jáne qala qurylysynyń ózekti túıtkilderi talqylanǵan brıfıng barysynda sáýletshi Alekseı Abılov kóterdi, dep habarlaıdy QazAqparat tilshisi.
«Bizdiń elde qalanyń bas jospary óz betinshe, al salynyp jatqan nysandar óz betinshe júredi. Qurylys kompanııalary bas josparǵa baǵynbaıdy. Osylaısha, shynaıy ómirde turǵyndardyń ómir súrýine qolaısyz nysandar boı kóteredi. Josparda qanshama esepteýler men boljamdar kórsetiledi. Degenmen, ony syzyp bolǵannan soń, «qalǵan is bizdiń sharýamyz» dep qurylysqa qarjy quıatyn ınvestorlar kirisedi. Bul jerde naryqtyq ekonomıkaǵa basymdyq berilip ketedi. Bul durys emes. Muny ózgertý kerek. Óıtkeni, shahardyń bas jospary sol aýmaqta turatyn adamdardyń aldaǵy ómir súrý ortasyn qalyptastyrady. Qazir kópqabatty úıler, tyǵyz ornalasqan nysandar kóbeıip ketti. Elimizdiń iri úsh qalasyndaǵy qurylys adamdarǵa emes, kólikterge arnalyp salynyp jatqan sııaqty. Saıabaq, mektep, balabaqsha, dúken, balalar oınaýǵa arnalǵan oryndar men ózge de qajetti áleýmettik nysandar eskerilmeıdi. Bas josparǵa baǵynbaı, óz qalaýymen qurylys júrgizetin kompanııalardy jazalaý kerek. Ol úshin zańǵa ózgeris engizý qajet dep esepteımin», - dedi Alekseı Abılov.
Eske sala keteıik, 1 tamyzdan bastap Almatyda Qala qurylysy keńesi jumysyn bastaıdy.
