Qalany qara tútin basty: Óskemendikter taǵy da aýa sapasynyń nasharlaǵanyna shaǵymdandy
ÓSKEMEN. KAZINFORM – Búgin tańerteńnen beri Óskemen qalasynyń turǵyndary aýa sapasynyń nasharlap ketkenine shaǵymdanyp jatyr.
Qala turǵyndary tańerteńnen aýa sapasynyń kúrt nasharlap ketkenin aıtyp, dabyl qaqty. Kóshege shyqqan halyq qatty jótelip, tamaqtary aýyryp, júrekteri aınyǵanyn alǵa tartty.
Tipti burynnan taza aýdan sanalatyn Jibek matalar kombınaty yqshamaýdanyn qara tútin basqan. Shaǵym túsken soń ShQO ekologııa departamentiniń mamandary tekserýge attandy.
«Qazir eki jerde aýa sapasyna qatysty ólsheý jumystary júrgizilip jatyr. Atap aıtqanda, «Samarskoe shosse» aýdanyndaǵy sanıtarlyq-qorǵaý aımaǵynda jáne Gagarın býlvary kóshesinde. Aýa quramyndaǵy kúkirtti sýtegi, azot dıoksıdi jáne basqa da zattardyń kontsentratsııasy anyqtalady. Ólsheý nátıjeleri shyqqan soń birden habarlanady», - dep habarlady departamenttiń baspasóz qyzmetinen.
Eske salsaq, osyǵan deıin Óskemendegi Nazarbaev dańǵylynda ornalasqan Dostyq úıi men Gagarın býlvary kóshesiniń mańyndaǵy turǵyn úılerdiń halqy aýa sapasynyń nasharlap ketkenine shaǵymdanǵan.
Ekologtar tekserý júrgizgen soń hlorsýteginiń shekti ruqsat etilgen kontsentratsııasynan asyp ketýi tirkelgen.
