«Qalamyzǵa - taza aýa» aktsııasy oń nátıjesin berýde - A.Rahımbetov
ALMATY. 17 aqpan. QazAqparat /Ádilet Musahaev/ - Almaty qalasy atmosferalyq aýasynyń lastaný ındeksi 2009 jylǵa qaraǵanda 11,7 paıyzǵa tómendegen.
Bul qala ákimdiginiń atmosferaǵa zııandy zattardy tastatpaý turǵysynda atqarylyp jatqan sharalarynyń nátıjesi. Bul jaıynda búgin Almaty qalasy tabıǵı resýrstar men tabıǵat paıdalanýshylardy baqylaý basqarmasynyń basshysy Altaı Rahımbetov 12 qańtar men 12 aqpan aralyǵynda qala atmosferasyn jaqsartýǵa arnalǵan «Qalamyzǵa - taza aýa» atty aılyqtyń qorytyndysyna arnalǵan dóńgelek ústelde málim etti.
A.Rahımbetov qaladaǵy ekologııalyq ahýaldardy ekologtardyń kúshimen sheshý múmkin emestigin, ol barlyq mekemeler men qoǵamdaǵy halyqtyń jumyla jumys isteýin qajet etetindigin atap ótti. Sondyqtan bul aktsııaǵa jol polıtsııa sy basqarmasy, kólik baqylaý ınspektorlary, tehnıkalyq jáne metrologııalyq baqylaý komıteti, qazgıdromed jáne taǵy basqa mekemeler qyzyǵýshylyq tanytqan.
«Atalǵan aılyqtyń maqsaty - qoǵam nazaryn ekologııalyq máselelerdi sheshýge aýdartý. Nátıjesinde qolǵa alynǵan shara jurtshylyqtan qoldaýyn taýyp, tekke uıymdastyrylmaǵandyǵyna kóz jetkizdik», -deıdi ol.
Sondaı-aq ol Elbasymyz N.Á. Nazarbaevtyń tapsyrmasymen elimizde kásipkerlikti damytýǵa úlken nazar aýdarylyp jatqandyǵyn, degenimen, kásipkerler de ózderi turatyn qalasynyń ekologııasyna nemquraıly qaramaı, qoǵam aldynda isterine jaýapty qaraý kerektigin jetkizdi. «Qazirgi ýaqytta biz sapasy tómen janar-jaǵarmaıdy taratý jaǵdaılarymen jáne de belgilengen erejelerdi buzatyn óndiris oryndaryn kezdestirip jatamyz. Sondyqtan osyndaı sharany ótkizý arqyly qalanyń árbir turǵynyna oı salǵymyz keldi», -deıdi A.Rahımbetov.
Sonymen qatar ol qalanyń tazalyǵyn arttyrý úshin «Qala tazalyǵy» aktsııasy da qatar júrip jatqandyǵyn aıtyp ótti. «Onyń nátıjesinde qaladaǵy tazalyq erejesin saqtamaıtyn kóptegen turǵyndarymyz tirkeýge alyndy. Máselen, halyqtyń keıbiri qoqysty arnaýly orynǵa aparmaı kóshege tastaı salady», -deıdi ol.
