«Qalamyzǵa - taza aýa» aktsııasy aıasynda birqatar óndiris oryndaryna aıyppul salyndy
ALMATY. 17 aqpan. QazAqparat /Ádilet Musahaev/ - «Qalamyzǵa - taza aýa» aktsııasy aıasynda ІІD Jol polıtsııasy basqarmasy aýany lastaýǵa qatysty 1456 avtokólik ıesin ákimshilik jaýapqa tartqan, onyń 11-i qala syrtynan keletin avtobýstar.
Jalpy somasy 4 mln 614 myń 552 teńge kóleminde aıyppul salynǵan. Bul jaıynda búgin Almaty qalasy Tabıǵı resýrstar men tabıǵat paıdalanýdy retteý basqarmasy bastyǵynyń orynbasary Murat Batyrbaev Almatyda ótken dóńgelek ústelde aıtty.
Onyń aıtýynsha, aımaqaralyq «Jetisý» kólik baqylaý ınspektsııasymen 35 qoǵamdyq kólik ortalyǵynyń tehnıkalyq aqaýy tekseristen ótken. Onyń 28-i qala ishindegi baǵyt boıynsha júretin avtobýs parkteri bolsa, 17-si qala mańynan keletin qoǵamdyq kólikterdiń parkteri. Ereje buzǵan jeke tulǵalarǵa QR Ákimshilik kodeksiniń 247 babynyń 1 tarmaqshasy boıynsha kólik jáne jyljymaly quraldardy paıdalanýda shekten shyǵý, zııandy qaldyqtardy aýaǵa mólsherden kóp shyǵarǵany úshin jalpy 51408 teńge kóleminde aıyppul salynǵan.
Al, Balqash-Alakól ekologııa departamenti ónim shyǵarýmen aınalysatyn kásiporyndardy teksergen. «Tekseris nátıjesinde aýaǵa bólinetin zııandy zattardy tazalaý qurylǵylarynyń qosylmaýy, óndiris barysynda shyǵatyn qaldyqtarǵa mán berý mindetteriniń oryndalmaǵany úshin 1 mln 186 myń 920 teńge kóleminde aıyppul salyndy», -deıdi ol.
Sonymen qatar Almaty qalasy boıynsha tehnıkalyq retteý jáne metroloııa komıteti janarmaı quıý beketterin tekseristen ótkizgen. «Tekseris barysynda «Qazaqstan gazprom munaı» kompanııasynyń eki janar maı quıý beketi ónim taratýdaǵy mindetterdi durys atqarmaı jatqandyǵy aıqyndaldy. Máselen, janar maı markalarynyń saı kelmeýi, ólsheý júıesiniń buzylýy baıqalǵan. Sondyqtan zańdy tulǵalarǵa 136080 teńge, al ekinshi mindettegi jeke tulǵalarǵa 66528 teńge kóleminde aıyppuldar salyndy», -deıdi M. Batyrbaev.
