Qalamyzda jaǵdaı turaqty — elorda ákimi

NUR-SULTAN. QazAqparat - Nur-Sultan qalasynyń ákimi Altaı Kólginov Instagram-daǵy óz paraqshasynda turǵyndardy tótenshe jaǵdaı rejıminiń barlyq erejelerin saqtaýǵa jáne senimdi derekkózderde jarııalanǵan aqparattarǵa ǵana senýge shaqyrdy, dep habarlaıdy QazAqparat.

«Qurmetti qala turǵyndary! Qalamyzda jaǵdaı turaqty. Degenmen, quqyq qorǵaý organdarynyń barlyǵy jumysyn kúsheıtilgen rejımde jalǵastyrýda. Elordanyń perımetri boıynsha blokpostar ornatyldy, polıtsııa qyzmetkerleri aýlalardy jáne páterlerdi aralaýda.

Ózderińiz biletindeı, qalamyzǵa saǵat 23:00-den 7:00-ge deıin komendanttyq saǵat engizildi. Polıtsııa qalany kúzetedi. Bul ýaqytta turǵyndardyń syrtqa shyǵýyna tyıym salynady.

Qala turǵyndaryn ózderi men jaqyndarynyń qaýipsizdigi úshin TJ rejıminiń barlyq erejesin saqtaýǵa, adam kóp jınalatyn oryndarǵa barmaýǵa, destrýktıvti kúshterdiń arandatýyna erimeýge, tek resmı aqparat kózderine senýge shaqyramyn!»,- dep jazdy qala ákimi.