«Qalamqastaǵy» órt qorshaǵan ortaǵa eleýli zııan tıgizip jatqan joq – ekologııa departamenti
AQTAÝ. QazAqparat - Mańǵystaý oblysyndaǵy Qalamqas ken ornynan shyqqan órtti sóndirýge Atyraý oblysynan qosymsha 7 tehnıka jetkizildi.
Arasynda sekýndyna 200 lıtr sý shashatyn avtkólikter de bar. Qazir apat ornynda 27 tehnıka men 83 adam tilsiz jaýmen kúresip jatyr. Qyzyl otqa jaqyndaý múmkin bolmaǵandyqtan mamandar keshe órt sóndirýdiń taktıkasyn ózgertti, dep habarlady Habar 24kz .
Tilsiz jaýdy aýyzdyqtaý úshin jerdi qazyp, jol salynyp jatyr. Qazir apatqa baılanysty birneshe quzyrly organ ókilderiniń qatysýymen arnaıy komıssııa quryldy. Olar apattyń shyǵý sebebin, keltirilgen shyǵyn men qorshaǵan ortaǵa kelgen zalal kólemin anyqtamaq. Al Mańǵystaý aýdandyq polıtsııa basqarmasy jer qoınaýyn paıdalanýshy kompanııaǵa qatysty qylmystyq is qozǵady.
«Bul munaıgaz kenishterinde jıi bolatyn ádettegi jaǵdaı. Órt shalǵan uńǵyma áli iske qosylmaǵan, qazylyp jatqan kezde apatqa ushyrady. Qaı jerde qandaı qatelik ketkenin arnaıy tekseristen soń anyqtaıtyn bolamyz. Barlyǵyna osynda jumys istep jatqan «Sý bý» kompanııasy jaýapty bolady»,-deıdi «Qazmunaıgaz» UK Basqarma tóraǵasynyń orynbasary Jaqyp Marabaev.
«Qorshaǵan ortaǵa eleýli zııan keletin jaǵdaılar bolǵan joq. Óıtkeni Kaspıı teńiziniń ózi apat bolǵan orynnan 45 shaqyrym qashyqta ornalasqan. ıAǵnı dambasy bar. Qazir Kaspıı teńizine sýdyń tógilý qaýpi tónip turǵan joq. Sonymen qosa basty nazarǵa alatyn másele ol jerde jerasty sýy ǵana gaz aralas tógilýde. Munaı tógilý faktileri bolǵan joq»,-deıdi oblystyq ekologııa departamentiniń basshysy Rýslan Tókenov.
