Qalamqastaǵy oqıǵa: Kenishke jan-jaqty tehnıkalyq saraptama júrgizilmek

NUR-SULTAN. QazAqparat - Qalamqas kenishindegi oqıǵadan keıin tótenshe jaǵdaılardy aldyn alý úshin jan-jaqty tehnıkalyq saraptama júrgiziletin bolady, dep habarlaıdy QazAqparat Energetıka mınıstrliginiń baspasóz qyzmetine silteme jasap.

Búgin Mańǵystaý oblysynyń óńirlik kommýnıkatsııalar qyzmetinde BAQ ókilderi úshin brıfıng ótti. Brıfıng barysynda «Qalamqas» ken ornynda bolǵan tehnogendik apatqa qatysty máseleler talqylandy.

Jaqyp Marabaev, «Mańǵystaýmunaıgaz» AQ bas dırektorynyń birinshi orynbasary Baqyt Imanbaev, «QazMunaıGaz» óndirý jáne burǵylaý tehnologııalary ǵylymı-zerttý ınstıtýty» JShS Bas dırektory Baqytjan Hasanov, «Munaı-gaz ǴJZI» AQ bas dırektory Oleg Gershtanskıı qatysty.

«QazMunaıGaz» UK AQ basqarma tóraǵasynyń óndiris jónindegi orynbasary Jaqyp Marabaevtyń aıtýynsha, osy jyldyń 13 naýryzynda «Mańǵystaýmunaıgaz» AQ-ǵa qarasty Qalamqas ken ornynyń kúrdeli ýchaskesinde uńǵymanyń qurylysy barysynda tehnogendik sıpattaǵy gaz-sý aralas tabıǵı burqaq shyqqan. Onyń aıtýynsha, naýryzdyń 13-24 kúnderi mamandar uńǵymany kúrdelendirilgen burǵylaý eritindisimen jýý, sondaı-aq grıfondardy joıý úshin jóndeý-oqshaýlaý jumystaryn júrgizgen. Qoldanǵan sharalarǵa qaramastan, 25 naýryz kúni jer betine shyqqan gaz-sý qospasynyń oshaǵy jana bastaıdy. Mańǵystaý oblysy boıynsha TJD bastyǵy Q.B. Bazarbaevtyń basshylyǵymen TJ, ekologııa, polıtsııa, ortalyq memlekettik organdar, QMG, «Mańǵystaýmunaıgaz» AQ, «SıBÝ» JShS jáne Mańǵystaý oblysy ákimdigi ókilderinen qurylǵan jedel shtab órt oshaǵyn aýyzdyqtaý boıynsha qajetti sharalardy qabyldaǵan. Tótenshe jaǵdaıdy joıý úshin 80-nen astam maman jáne 25 túrli tehnıka jumyldyrylǵan.

Jaqyp Marabaevtyń aıtýynsha, qaraǵanda, 28 naýryzda saǵat 01.05-te №8237 uńǵymasy mańaıyndaǵy grıfonda shyqqan órt aýyzdyqtalǵan. Qazirgi tańda gaz-sý aralas tabıǵı burqaqtyń jer betine shyǵýy toqtatylyp, paıda bolǵan grıfondardyń jabylǵany belgili bolyp otyr. Zardap shekkender men qaza bolǵandar joq. Aldyn ala málimetter boıynsha, materıaldyq shyǵynnyń kólemi shamaly.

«Árıne, biz qashanda osyndaı oqıǵalarǵa daıyn bolýymyz kerek - bul úshin osy sııaqty qaýip-qaterler týyndaǵan kezde ýaqtyly jáne sapaly áreket etý boıynsha arnaıy reglamentter ázirlengen. Mundaı jumystarǵa biliktiligi asa joǵary, óndiristi jete biletin jáne mol tájirıbesi bar munaıshy-mamandar qajet ekenin basa aıtqym keledi. 8237 uńǵymadaǵy órtti aýyzdyqtaý úshin eńbek etken barlyq áriptesterime alǵys bildiremin. Olardyń otbasy múshelerine aıtarym - endi qaýip joq, ýaıymdamańyzdar», - deıdi Jaqyp Marabaev.

Qazirgi kezde nysanda qaıta qalpyna keltirý boıynsha keshendi jumystar júrgizilýde. Mamandar aldaǵy ýaqytta osyndaı tótenshe jaǵdaılardyń aldyn alý úshin jan-jaqty tehnıkalyq saraptamalar júrgiziletin bolady. Saraptamalardyń nátıjesi boıynsha, Qalamqas ken ornynyń ortalyq bóligindegi uńǵymalardy jobalaý kezinde burǵylaý uńǵymalarynda júrgiziletin jumystardyń qaýipsizdigin jáne sapasyn qamtamasyz etý úshin arnaıy túzetý sharalary qabyldanatyn bolady.

Aıta keteıik, 13 naýryzda Mańǵystaý aýdanyndaǵy «MańǵystaýMunaıGaz» AQ-nyń «Qalamqas» munaı-gaz ken ornynda «Sı Bý» ınjenerlik burǵylaý kompanııasy» JShS №8237 uńǵymasyn burǵylaý barysynda gaz-sý qospasy atqylady. Al 25 naýryz kúni saǵat 07:10-da Mańǵystaý oblystyq TJD kezekshi-dıspetcherlik qyzmetine «Qalamqas» ken ornyndaǵy uńǵymadan shyqqan gaz janyp, bıikti 10 metrge deıin jalyn atqylap turǵandyǵy habarlandy.

Al keshe QR Energetıka mınıstrligi ken ornyndaǵy órttiń tolyǵymen sóndirilgenin málimdegen bolatyn.