Qalamqastaǵy apattan ekologııaǵa úlken zııan kelmedi - Energetıka mınıstrligi
NUR-SULTAN. QazAqparat - QR Energetıka vıtse-mınıstri Maǵzum Myrzaǵalıev Qalamqas ken ornyndaǵy apattyń saldaryn túsindirdi, dep xabarlaıdy QazAqparat tilshisi.
"Búgin ot tolyǵymen óshirildi. Biz ol jerde arnaıy ekologııalyq beketti ashtyq. Sonyń málimetine sáıkes, qorshaǵan ortaǵa úlken ekologııalyq zııan kelgen joq. Sebebi jerdiń astynan gaz ben sý shyqty. Munaı bolǵan joq. Al gaz tolyǵymen janyp ketti", - dedi M.Myrzaǵalıev jýrnalısterge bergen suxbatynda.
Onyń aıtýynsha, aldaǵy ýaqytta bosqa janyp ketken gazdyń kólemi esepteledi. Sonyń negizinde ekologııaǵa kelgen zııanda da anyqtaýǵa múmkindik bar. "Osy jumysqa birneshe apta ketetin shyǵar. Sol kezde biz barlyq aqparatty jarııalaımyz", - dep atap kórsetti M.Myrzaǵalıev.
Aıta keteıik, 13 naýryzda Mańǵystaý aýdanyndaǵy «MańǵystaýMunaıGaz» AQ-nyń «Qalamqas» munaı-gaz ken ornynda «Sı Bý» ınjenerlik burǵylaý kompanııasy» JShS №8237 uńǵymasyn burǵylaý barysynda gaz-sý qospasy atqylady. Al 25 naýryz kúni saǵat 07:10-da Mańǵystaý oblystyq TJD kezekshi-dıspetcherlik qyzmetine «Qalamqas» ken ornyndaǵy uńǵymadan shyqqan gaz janyp, bıikti 10 metrge deıin jalyn atqylap turǵandyǵy habarlandy.
Búgin QR Energetıka mınıstrligi ken ornyndaǵy órttiń tolyǵymen sóndirilgenin málimdedi.
