Qalamgerlerge memleket tarapynan qansha qalamaqy tólenedi

ASTANA. KAZINFORM — Premer-Mınıstr Oljas Bektenov Májilis depýtattarynyń saýalyna oraı elimizde qalamgerlerge memleket tarapynan qansha qalamaqy tólenetinin atady.

- Ulttyq qundylyqtarǵa, ult rýhanııatyna qatysty Memleket basshysynyń Joldaýlary men Ulttyq quryltaı otyrystarynda bergen tapsyrmalaryn iske asyrý boıynsha jumystar júrgizilýde. Bul rette elimizdiń mádenıetin saqtaýǵa jáne damytýǵa zor úles qosqan asa daryndy shyǵarmashyl qyzmetkerlerdi memlekettik qoldaý maqsatynda aqyn-jazýshylarǵa Prezıdenttik arnaýly ádebı syılyǵy, mádenıet salasyndaǵy memlekettik stıpendııa taǵaıyndalady. 2022 jyldan beri «Aıboz» ulttyq ádebı syılyǵy (7 nomınatsııa boıynsha ár syılyqqa 5 mln teńge qarastyrylǵan), «Daryn» memlekettik jastar syılyǵy beriledi, - dedi Úkimet basshysy.

Premer-mınıstr ádebıet salasynda joǵary shyǵarmashylyq jetistikterge jetken qalamgerlerge beriletin «Qazaqstannyń halyq jazýshysy» qurmetti ataǵy qaıta qalpyna keltirilgenin eske salady.

- Memleket tarapynan qalamgerlerge qalamaqy tóleý jumysy júıeli túrde júrgizilýde. Qalamaqy mólsheri – 2025 jyly 1 avtorlyq paraqqa (22-23 bet – red. eskertpesi) 510 myń teńge. Sonymen qatar «Jańa Qazaqstannyń ádebı-tanymdyq panoramasy» jobasy aıasynda 20 jas qalamgerge grant (ár grant ıesine 5,1 mln teńge qarajat qarastyrylǵan) taǵaıyndalady, - dedi Oljas Bektenov.

Buǵan deıin Májilis depýtaty Qazybek Isa elimizde Ádebıet ınstıtýtyn ashylsa, qalamgerler alańsyz shyǵarmashylyqpen aınalysýy úshin eńbegine laıyqty qalamaqy tólense degen usynysyn bildirgen edi..