Qalamgerlerge qalamaqy berý máselesi naqty sheshilýi tıis – Qazybek Isa

ASTANA. KAZINFORM – Premer-mınıstr Oljas Bektenovtiń atyna saýal joldaǵan Májilis depýtaty Qazybek Isa elimizde Ádebıet ınstıtýtyn ashylsa, qalamgerler alańsyz shyǵarmashylyqpen aınalysýy úshin eńbegine laıyqty qalamaqy tólense degen usynysyn bildirdi.

— Qazirgi qoǵamda zamanaýı qazaq ádebı keıipkerdiń beınesi tolyq somdalmaǵan. Ádebıet pen memlekettik ıdeologııa arasyndaǵy ózara yqpal álsiz, jas býynnyń ádebıetke qyzyǵýshylyǵy tómen. Sondyqtan bul baǵytta júıeli mádenı saıasat pen rýhanı baǵdar qajet. Qazir qazaq ádebıetinde rýhanı daǵdarys baıqalady, kóp shyǵarma tek ótken zamanyń súrleýinen shyǵa almaı otyr. Al qazir elge bolashaqqa senimdi, jarqyn jol kórsetetin shynaıy shyǵarmalar kerek. Ásirese, jastarǵa ulttyq ustanym men jarqyn tehnologııalyq jańa zamandy ushtastyra bilgen ulttyq ádebı keıipkerler kerek, - dedi ol.

Májilis depýtaty qazaqtyń sańlaq jazýshysy Sattar Erýbaevtyń ótken ǵasyrdyń otyzynshy jyldary 20 jasynda jazǵan «Meniń qurdastarym» romanyndaı óz zamandastaryn somdaǵan, ulttyq ádebıette tulǵalyq, rýhanı jańarý ıdeıasyn jyrlaǵan kesek shyǵarmalar qajettigine nazar aýdartady.

— Bizdiń usynysymyz Qazaqstanda da AQSh, Qytaı, Germanııa, Úndi elderindegideı Ádebıet ınstıtýtyn ashý kerek. Kezinde Keńes odaǵynyń ózi Ádebıet ınstıtýtyn ashyp, qalamgerlerdiń jańa býynyn daıyndap shyǵardy. Qalamgerler alańsyz shyǵarmashylyqpen aınalysýy úshin eńbegine laıyqty qalamaqy máselesi naqty jolǵa qoıylýy tıis, - dedi Qazbek Isa. 

Eske sala keteıik, buǵan deıin depýtattardyń eń tómengi jalaqynyń mólsherin kóterýdi usynǵanyn jazǵan edik.