«Qalamger-Azamat» respýblıkalyq forýmy elimizdiń jas jýrnalısteriniń kásibı ósýine jáne shyǵarmashylyq tájirıbe almasýyna múmkindik týǵyzady
ASTANA. Tamyzdyń 18-i. QazAqparat. QR Baılanys jáne aqparat vıtse-mınıstri Nuraı Orazov «Zańǵar» shyǵarmashylyq birlestigi uıymdastyrǵan ІІІ Respýblıkalyq «Qalamger - Azamat» jas tilshiler forýmynyń qatysýshylarymen kezdesti, dep habarlaıdy QazAqparat.
Sharanyń basty maqsaty - jas jýrnalısterdiń Otanymyzdyń áleýmettik-ekonomıkalyq turǵydan damýyna atsalysýǵa shaqyratyn jobalaryn qoldap, semınar-trenıngterge qatystyrý.
Vıtse-mınıstr Nuraı Orazov kezdesý kezinde Elbasynyń jastar damýyna erekshe kóńil bólip, olardyń ıdeıalary jáne bastamalaryna qoldaý kórsetýge shaqyratynyn, «Qalamger-Azamat» respýblıkalyq forýmy elimizdiń jas jýrnalısteriniń kásibı ósýine jáne shyǵarmashylyq tájirıbe almasýyna múmkindik týǵyzatynyn atap ótti.
QR Baılanys jáne aqparat mınıstri Asqar Jumaǵalıev forým qatysýshylaryna joldaǵan quttyqtaý sózinde «Qazirgi egemen Qazaqstan jaǵdaıynda Sizderdi, jas qalamgerler, bıik maqsattar men belester kútip tur. Qazaqstan eliniń, qazaq jýrnalıstıkasynyń qaryshtap damýy Sizderge, jastarǵa tikeleı baılanysty ekendigine senimdimin. Sanaly da sapaly, bilimdi de belsendi jastary bar eldiń qashanda eńsesi bıik, bolashaǵy zor bolmaq. Men senderge, jas memleketimizdi damýyna úles qosyp júrgenderińiz úshin alǵysymdy bildirip, bolashaqta naǵyz óz salasyn meńgergen maıtalmandary bolýlaryńyzǵa tilektespin», dep jastarǵa sáttilik tiledi.
Forýmǵa QR Bilim jáne ǵylym mınıstri J.Túımebaev, QR Parlamentinińi Májilisiniń depýtaty A.Smaıyl, jazýshy Á.Tarazı, «Nur Otan» HDP «Jas Otan» jastar qanatynyń atqarýshy hatshylyǵynyń hatshysy N.Óteshev qatysty.
Atalǵan sharada «Qazaqstan» ulttyq telearnasynyń Qoǵamdyq saıası baǵdarlamalar bóliminiń jetekshisi M.Manatbek, «Zańǵar» shyǵarmashylyq birlestiginiń tóraǵa keńesshisi E.Jaqypbaı, «Saqshy» gazetiniń bas redaktory R.Sábıtuly baıandama jasady.
Forým aıasynda «Qazaq baspasóziniń damýy»; «Telebaǵdarlamalar men jańalyqtar sıýjetteriniń búgingi sapasy qaı deńgeıde»; «Qazaq tilindegi ınternet resýrstarynyń damýy» atty semınarlar ótti.
Tilshiler «7» telearna jáne ulttyq akademııalyq kitaphanada ótken sheberlik saǵattarǵa qatysyp, «Nur-Astana» gazetiniń redaktsııasynda, sondaı-aq Respýblıkalyq Ulan gvardııasynda boldy. Sonymen qatar, forým sheńberinde «Nur Otan» HDP «Jas Otan» jastar qanatynyń qazaq tilindegi ınternet saıtynyń tusaýkeseri ótti.
Forýmǵa 18-23 jas aralyǵyndaǵy jas jýrnalıster qatysty. Osy ýaqytqa deıin atalǵan forým 2008 jyly Almaty jáne Astana qalalarynda ótken.
