«Qalamger - Azamat» ІІІ respýblıkalyq jas tilshiler forýmynda bas qosqan jýrnalıster 2011 jyldy - Qazaqstan jastary jyly dep ataýdy usynbaq
ASTANA. Tamyzdyń 16-sy. QazAqparat /Gúlmıra Álıakparova/ - Búgin Astanada «Qalamger - Azamat» ІІІ respýblıkalyq jas tilshiler forýmy bastaldy. Úsh kúnge sozylatyn forým barysynda Qazaqstannyń túkpir-túkpirinen jınalǵan jas jýrnalıster qazaq baspasóziniń damýy, telebaǵdarlamalar men jańalyqtar sıýjetteriniń sapasy jáne qazaq tildi ınternettiń damýy máselelerin talqylaıtyn bolady.
Aıta keteıik, 18-23 jas aralyǵyndaǵy jýrnalısterge arnalǵan alǵashqy forým 2008 jyly Almaty qalasynda bastaý alyp, Astana qalasynyń 10 jyldyq mereıtoıyna oraılastyrylyp elordada jalǵasqan bolatyn. Ekinshi forým 2009 jyly osy Astana qalasynda «Jas patrıottar» ataýymen ótti.
«Zańǵar» shyǵarmashylyq birlestiginiń tóraǵasy Aıdar Qyryqbaıulynyń aıtýynsha, forýmdy ótkizýdegi maqsat, jastardy otansúıgishtikke, eljandylyqqa shaqyra otyryp, olardyń kásibı biliktiligin shyndaıtyn, zamanaýı zańdylyqtardy meńgerýge múmkindik týǵyzý bolyp tabylady.
«Sondaı-aq, aqparattyq tájirıbe almasý baǵytynda túrli salada qalam terbeýge, jýrnalıstıkanyń qyr-syryn úırenýge talpynǵan jas býynnyń basyn qosý», - deıdi ol.
A.Qyryqbaıulynyń aıtýynsha, buǵan deıingi forýmdarda kóterilgen tyń taqyryptardyń nátıjesinde, Ál-Farabı atyndaǵy Qazaq Ulttyq ýnıversıtetinde qazaq tildi jýrnalısterdi daıyndaýǵa memlekettik bilim granttaryn 30 paıyzǵa arttyrý týraly Elbasynyń atyna hat joldanyp, bul usynys óz qoldaýyn tapqan.
Sondaı-aq ol, ІІІ forým barysynda kóteriletin - qazaq baspasóziniń damýy, telebaǵdarlamalar men jańalyqtar sıýjetteriniń sapasy men qazaq tildi ınternettiń damýy máselelerine qatysty aıtylǵan oı-pikirler men usynystar boıynsha da nátıjeli ister atqarylatynyna senimin bildirdi.
«Sonymen birge, forýmnyń sońynda 2011-shi jyldy - Qazaqstan jastary jyly dep jarııalansa degen tilekterimizben Elbasynyń atyna úndeý joldamaqpyz», - dedi ol.
