«Qalamger-Azamat» forýmyna qatysýshy jas tilshiler Memleket basshysyna úndeý joldady

ASTANA. Tamyzdyń 18-i. QazAqparat /Qanat Mámetqazyuly/ - Búgin «Qalamger-Azamat» forýmyna qatysýshy jas tilshiler Memleket basshysy N. Nazarbaevtyń atyna úndeý joldady. Úndeý QR Baılanys jáne aqparat vıtse-mınıstri Nuraı Orazovtyń «Táýelsiz urpaqtyń 20 jyldyǵy» atty ІІІ Respýblıkalyq «Qalamger-Azamat» jas tilshiler forýmynyń qatysýshylarymen kezdesýi barysynda jarııalandy,

dep habarlaıdy QazAqparat.

«Ulan baıtaq mekeni bar qazaq dalasynda jigerli jastary bar eldiń keleshegi jarqyn degen uǵym qalyptasqany belgili. Siz, Qazaqstan halqyna Joldaýyńyzda: «Táýelsizdikke qolymyz jetken alǵashqy kúnnen bastap Sizder men bizder barlyq qajyr-jigerimizdi jumsap, eńsesin asqaqtatqan jańa Qazaqstan barǵan saıyn nyq senimmen alǵa basyp keledi. Damýdyń ózi tańdaǵan dańǵylyna túsken elimizdiń ataǵy shartarapqa taralyp, álemdik qoǵamdastyqtyń aldyndaǵy abyroıy da jyldan-jylǵa artyp otyr», - degen edińiz. Elimizdiń qol jetken tabystary men alatyn asýlaryna jastar da ózderiniń erik -kúshi men jiger-qaıratyn súbeli qosýy basty paryz», delingen úndeýde. Sonymen birge, forýmǵa qatysýshylar elimizdiń jetken jetistikterine toqtala kele, túrli dárejede ótkizilip jatqan sharalarǵa úlken mán beretindikterin alǵa tartady.

«Jastyq jiger men kúsh-qaıratyn el kelesheginiń damýyna arnaǵysy keletin osy jastarymyzdyń atynan ózińizge aıtar ótinish tilegimiz bar. Osy kezeńge deıingi jyldar, tarıh qoınaýynda jáne el esinde ózindik ereksheligimen qalyp, óz enshisine keleli isterdi qamtydy. Atap aıtar bolsaq, «2000 jyl - Mádenıetti qoldaý jyly», «2005 - Aýyl jyly», «2006-2009 Densaýlyq jyly» dep belgilenip, kóptegen bastamaly ister oń sheshimin taýyp, qýanarlyq nátıje berýde. Endigi kezekte alda kele jatqan 2011 jyldy - «Jastar jyly» dep belgileýińizdi ótinemiz», delingen úndeýde.