Qalamaqy baspanyń qanjyǵasyn maılamaı, qalamgerdiń qaltasyna túsýi tıis - N.Orazalın

ASTANA. QazAqparat - Qalamaqy baspanyń qanjyǵasyn maılamaı, qalamgerdiń qaltasyna túsýi tıis. Búgin Aqordada QR Memlekettik hatshysy Gúlshara Ábdiqalyqova men elimizdiń belgili qalamgerleri arasyndaǵy kezdesý aldynda QR Parlamenti Májilisiniń depýtaty, aqyn Nurlan Orazalın osyndaı pikir bildirdi.

«Biz memleket retindegi qoǵamdyq damýdyń jańa satysyna kóterilip otyrǵan elmiz. 90-shy jyldary alǵashqy táýelsizdik jarııalaǵan kezeńdegi qazaq eliniń aqıqaty men 2000-shy jyldardaǵy aqıqatty salystyrýǵa kelmeıdi. Óıtkeni, biz táýelsizdik jarııalaǵan kezde qazaq halqy memleket bola ma, bolmaı ma, degen ártúrli alyp-qashpa áńgimeler kóp boldy. Biraq, 2000-shy jyldarǵa qaraı qazaq eli, qazaq halqy memleket qurýǵa qabileti zor ekendigin dáleldedi. Al endi damýdyń úshinshi kezeńine ótip otyrmyz»,- dedi ol.

Onyń atap ótýinshe, Elbasy N.Nazarbaev 90-shy jyldardan bergi shırek ǵasyrǵa jýyq ýaqyttyń ishinde elimizdiń tutastyǵyn álem aldynda dáleldep, memleketimizdi damýdyń jańa kezeńine ótkizdi. «Máńgilik el» dep atalatyn uly jobany halqymyzǵa mejeli maqsat retinde aıqyndap berdi.

«Al ádebıetimiz de qoǵamnyń qozǵaýshy kúshi retinde óz damýynyń jańa satysyna ótip otyr. Burynǵydaı eskishe jazýdyń zamany ótip bara jatyr. Jańasha jazý biraz qıyndyqtar týyndatady», - dep atap ótti N.Orazalın.

Onyń aıtýynsha, ýaqyt, zamana talabyna saı shyǵarmalardy qalaı jáne qaı baǵytta jazý kerek degen saýal qoǵamda da, jazýshylar ortasynda da ózekti bolyp otyr. «Eń aldymen ádebı baılanystardy qaıta jandandyrýymyz qajet. Ádebıetimizdiń bar ekendigin álemdik deńgeıde tanytatyn qımyl-áreket jasaýymyz kerek. Ony quqyqtyq turǵyda bekitkenimiz jón. Taǵy bir úlken másele - qalamaqy. Ol óteýli bolýy kerek jáne ol baspalardyń qanjyǵasynda ketpeýi tıis»,- dedi ol.