Qalalyq iKOMEK109 ortalyǵy ótinish qabyldaıtyn jańa portaldy iske qosty
NUR-SULTAN. QazAqparat - Qalalyq iKOMEK109 monıtorıng jáne jedel áreket etý ortalyǵy jáne BTS Digital kompanııasy ótinish qabyldaıtyn jańa aitu.city portalyn iske qosty, dep habarlaıdy QazAqparat ikomekastana.kz saıtyna silteme jasap.
Onyń arqasynda elorda turǵyndary tek ózderiniń ǵana emes, sondaı-aq kópshiliktiń de ótinishteriniń dárejesin onlaın tártipte baqylaı alady.
Aitu.city – bul tirshilikti qamtamasyz etý, abattandyrý jáne qaýipsizdik, sonymen qatar Nur-Sultan qalasy ákimdiginiń qyzmetteri men jumysy máseleleri boıynsha ótinishterdi berýge arnalǵan jańa ınternet-alań. Eger buryn ótinishter men olardyń atqarylý dárejesin tek ótinish berýshilerdiń ózderi ǵana kóre alsa, endi árbir turǵyn caıtta jarııalanǵan ótinishterdi qarap, sonymen qatar olarmen áleýmettik jelilerde bólise alady. Bul qala túıtkilderine kóbirek mán berilip, olardyń tıimdi sheshilýine yqpal etetin bolady.
Qazaqstanda bul biregeı portal bolyp tabylady, ony tutastaı qaıtalaıtyn resýrs joq. Portaldy ázirleý barysynda tabysty halyqaralyq tájirıbelerge taldaý júrgizildi.
aitu.city qalaı jumys jasaıdy:
1-qadam. Ótinishti jiberý – Siz úlgini toltyryp, sýretti tirkeısiz.
2-qadam. Moderatsııa – Ótinim iKOMEK109-dyń atqarýyna qabyldanady jáne saıtta barlyq ótinishterdiń ortaq tiziminde jarııalanady.
3-qadam. Atqarylý dárejesi – Ótinimniń jaı-kúıi jónindegi jańalyqtar e-mail arqyly habarlandyrylady, sonymen qatar ony «Meniń ótinishterim» bóliminde kórýge bolady.
Qazir portal tek elorda turǵyndaryna ǵana qoljetimdi, alaıda bolashaqta servısti elimizdiń basqa da qalalarynda iske qosý josparlanyp otyr.
Esterińizge sala keteıik, 2018 jyly iKOMEK109 mıllıonnan astam ótinish qabyldady, al 2019 jyldyń basynan beri ótinishter sany 920 myńnan asyp úlgerdi. Barlyq ótinimder 109 nómirine qońyraý shalý jáne basqa da baılanys arnalary arqyly alyndy.
BTS Digital – jańa ónimder men servıster ekojúıesin qalyptastyrýshy ІT-kompanııa. Tolyǵyraq: https://btsdigital.kz/kz/.
iKOMEK109 – elordada joǵary ómir súrý sapasyn qamtamasyz etý úshin qalanyń tynys-tirshiligi men qaýipsizdigine monıtorıng júrgizetin memlekettik uıym. Tolyǵyraq: https://www.ikomekastana.kz/.
