Qalalyq jol ınfraqurylymyna qoıylatyn jańa biryńǵaı normatıv engizildi
ASTANA. KAZINFORM — «Qazaqstan jol ǵylymı-zertteý ınstıtýty» AQ (QazjolǴZI) ázirlegen, respýblıkalyq mańyzybar qalalardyń kóshe-jol jelisi obektilerin kútip-ustaýǵa, paıdalanýǵa jáne jóndeýge qoıylatyn biryńǵaı talaptardy belgileıtin vedomstvolyq normatıv bekitildi. Bul týraly Kólik mınıstrligi málim etti.
Qujattajóndeýaralyq merzimder, kepildik merzimderijáne qalalyq jol ınfraqurylymyn kútip-ustaýtártibi aıqyndalǵan. Ony engizý joldardyńsapasyn arttyrýǵa, qyzmet etý merziminuzartýǵa jáne jol qozǵalysy qaýipsizdigin qamtamasyz etýge múmkindik beredi.
Osy ýaqytqa deıin qalalardyń kóshe-jol jelisine qatysty jóndeýaralyq merzimder men kepildik mindettemelerin aıqyndaıtyn biryńǵaı talaptar bolmaǵan. Bul kórsetkishter árbir shart sheńberinde jeke belgilenip, nysandardy qabyldaý, olardy keıingi paıdalaný jáne anyqtalǵan aqaýlardy joıý kezinde quqyqtyq ári uıymdastyrýshylyq belgisizdikterdi týyndatatyn.
Jańa vedomstvolyq normatıv alǵash ret respýblıkalyq mańyzy bar qalalardyń kóshe-jol jelisi obektilerin kútip ustaý, paıdalaný jáne jóndeý boıynsha biryńǵaı tásildi bekitedi. Qujatta jol tóseminiń jóndeýaralyq qyzmet etý merzimderine, kepildik kezeńderine, jol qozǵalysyn uıymdastyrýdyń tehnıkalyq quraldaryna qoıylatyn mindetti talaptar belgilenip, sondaı-aq qalalyq jol ınfraqurylymyn kútip ustaý tártibi reglamenttelgen.
— Bul normatıvti ázirleýdegi basty maqsat — qalalyq jol ınfraqurylymyn paıdalanýǵa qatysty biryńǵaı ári ashyq talaptardy qalyptastyrý. Alǵash ret normatıvtik deńgeıde kóshe-jol jelisiniń negizgi elementteri úshin mindetti jóndeýaralyq merzimder men kepildik kezeńderi belgilendi. Bul oryndalǵan jumystardyń sapasyn baǵalaýda biryńǵaı tásildi qamtamasyz etip, merdiger uıymdardyń jaýapkershiligin arttyrýǵa jáne sonyń nátıjesinde qalalyq joldardyń qyzmet etý merzimin uzartýǵa múmkindik beredi, — dep atap ótti QazjolǴZI Normatıvtik-tehnıkalyq qamtamasyz etý departamentiniń dırektorynyń mindetin atqarýshy Fazyljanova A.
Normatıv kóshe-jol jelisiniń barlyq negizgi elementterine qoldanylady. Atap aıtqanda, jol jabyndary, kópir qurylystary, jol belgileri, tosqaýyl jáne jaıaý júrginshiler qorshaýlary, syrtqy jaryqtandyrý tirekteri, jol tańbalary, jol jıekteri jáne kóshelerdi jaılastyrýdyń basqa da elementteri qamtylǵan.
Qujattaǵy mańyzdy jańashyldyqtardyń biri kóshelerdi salý, rekonstrýktsııalaý, kúrdeli jáne ortasha jóndeý kezinde jol jabynynyń qorǵanysh tozý qabatyn mindetti túrde tóseý talaby. Bul qabat jol qurylymyn ylǵaldyń jáne kólik júktemesiniń áserinen qorǵaıdy, jabynnyń merziminen buryn buzylý qaýpin tómendetip, onyń qyzmet etý merzimin uzartady.
Qysqy kezeńde joldyń taıǵaqtyǵyn boldyrmaý jáne joıý maqsatynda ST RK 4036 talaptaryna sáıkes keletin kóktaıǵaqqa qarsy materıaldardy paıdalaný kózdelgen. Bul rette kóktaıǵaqqa qarsy materıal retinde natrıı hlorıdin (as tuzyn) qoldanýǵa jol berilmeıdi.
Qujatta kepildik merzimi ishinde oryndalǵan jumystardyń sapasyn baqylaýǵa erekshe nazar aýdarylǵan. Osy maqsatta jol obektilerine josparly tekserýler júrgizý qarastyrylǵan. Bul aqaýlardy ýaqtyly anyqtaýǵa, olardyń paıda bolý sebepterin belgileýge jáne merdiger uıymdardyń kepildik mindettemeleri sheńberinde olardy joıýyn qamtamasyz etýge múmkindik beredi.
Jańa vedomstvolyq normatıvtiń engizilýi Qazaqstandaǵy qalalyq jol ınfraqurylymyn basqarý júıesin jetildirýdegi mańyzdy qadam bolmaq. Biryńǵaı talaptar kóshelerdi paıdalaný men jóndeýge qoıylatyn tásilderdi birizdendirip, oryndalatyn jumystardyń sapasyn arttyrýǵa, jol nysandarynyń qyzmet etý merzimin uzartýǵa jáne jol qozǵalysy qaýipsizdiginiń deńgeıin kóterýge yqpal etedi.
Aıta keteıik, Qazaqstannyń respýblıkalyq joldarynda ornatylǵan 136 myńnan astam jol belgileriniń 97%-y normatıvtik talaptarǵa saı ekeni anyqtaldy.
