Qalalyq servısterdi basqarý: Astana tájirıbesi el óńirlerinde engiziledi
ASTANA. KAZINFORM – Búgin Úkimet otyrysynda QR Premer-mınıstriniń orynbasary – Jasandy ıntellekt jáne tsıfrlyq damý mınıstri Jaslan Mádıev Smart City sheshimderin engizýge qatysty túsinik berdi.
- Kelesi baǵyt – óńirlerdi tsıfrlyq transformatsııalaý. Óńirlerde Smart City sheshimderi engizilip jatyr: drondarǵa arnalǵan ınfraqurylym, sý resýrstary men qalalyq servısterdi basqarý jáne aýrýlardyń AI-dıagnostıkasy. Alaıda júıeli tásil ázirge qalyptaspaǵan. Sheshimder bir-birinen bólek damyp, ózara ıntegratsııalanbaǵan. Osy rette Astana qalasy ákimdiginiń jumysyn erekshe atap ótkim keledi. Elorda AI-Native City sheshimderin belsendi engizip jatyr. WIPO City of Innovation bastamasy aıasynda álemniń úzdik 15 qalasynyń qataryna endi. Almaty da osy modelge kóshýde. Bizdiń mindetimiz – ortaq derekter, esepteý qýattary men ahýaldyq ortalyqtar negizinde sheshimderdi biriktirý, - dedi J.Mádıev.
Onyń paıymynsha, ozyq tájirıbeler búkil el boıynsha júıeli túrde engizilýi tıis. Bul kólik, kommýnaldyq ınfraqurylymdy jáne qaýipsizdikti keshendi basqarýǵa múmkindik beredi.
- Búginde Smart City sheshimderi qala halqynyń 25 paıyzyn qamtıdy. 2027 jyly kórsetkishti 50%-ǵa, al 2028 jyly 70%-ǵa jetkizý josparlanǵan, - dedi Úkimet basshysynyń orynbasary.
Aıta keteıik, jaqynda QazTech, Ulttyq JI platformasy jáne Digital Qazaqstan týraly jazǵan edik.
