Qalalardyń krımınogendi aýdandarynda 176 statsıonarlyq beket qoıylady
NUR-SULTAN. QazAqparat – Іshki ister mınıstri Erlan Turǵymbaev aldaǵy eki jylda iri qalalardaǵy krımınogendi aýdandarda arnaıy 176 statsıonarlyq beket qoıylatynyn málim etti, dep habarlaıdy QazAqparat tilshisi.
«Memleket basshysy eldegi qaýipsizdikti saqtaýda Іshki ister mınıstrliginiń rólin erekshe atap ótip, bizdiń aldymyzǵa naqty mindetterdi qoıǵan bolatyn. Eń birinshi kezekte qoǵamdaǵy tártiptiń saqtalýyn tapsyrdy. Prezıdent ultaralyq kelisim men qoǵamdaǵy turaqtylyq – eń basty qundylyq ekenin atap ótti. Adamdar ózderin qaýipsiz ekenin sezinýi kerek», - degen mınıstr ІІM jumystyń servıstik modeli engizilip jatqanyn aıtyp ótti.
Erlan Turǵymbaevtyń sózinshe eń aldymen kóshelerde, baqtarda, adamdar kóp jınalatyn oryndarda qaýipsizdiktiń saqtalýyna basa mán beriledi.
«Ákimdikpen birge krımınogendi aýdandarda Japonııa, Ońtústik Koreıa jáne Sıngapýr elderiniń tájirıbesi boıynsha arnaıy statsıonarlyq beketter qoıylyp jatyr. Ol jerde polıtsııa qyzmetkerleri táýlik boıy minsiz qyzmet ete alatyndaı jaǵdaı jasalǵan. Búgingi tańda aımaqtarda osyndaı 44 beket ornatylǵan. Aldaǵy eki jylda dál osyndaı 176 beket ornatý kózdelip otyr», - dedi ol.
