Qalalardy «karantınge japqan» qostanaılyq azamat halyqtan keshirim surady
QOSTANAI. QazAqparat – WhatsApp arqyly jalǵan aqparat taratqan Meńdiqara aýdanynyń turǵyny oblys halqynan keshirim surady, dep habarlaıdy QazAqparat oblystyq polıtsııa departamenti baspasóz qyzmetine silteme jasap.
Buǵan deıin habarlaǵanymyzdaı, Qostanaı oblysynda WhatsApp jelisi arqyly jalǵan aqparat taratqan er adamǵa qatysty qylmystyq is qozǵaldy. Ol Meńdiqara aýdany Qasqat aýylynyń turǵyny Vladımır Dıadın bolyp shyqty. Osy qylyǵy úshin ol oblys halqynan keshirim surap, vıdeo joldady.
«WhatsApp jelisinde taraǵan Qostanaı, Lısakovsk, Rýdnyı, Tobyl qalalarynda karantın engizilgeni týraly aýdıojazbam úshin keshirim suraımyn. Bul jalǵan aqparat. Jaǵdaıdyń qıyn ekenin túsindim, feık siltemelerge senbeýge shaqyramyn», - deıdi Vladımır Dıadın.
Qazirgi ýaqytta polıtsııa osy fakt boıynsha tergeý sharalaryn jalǵastyrýda.
