Qalalardaǵy jylý berý júıesi aldaǵy qysqa daıyn ba

ASTANA. KAZINFORM - Aldaǵy qys merziminde elimizdiń aýmaǵyndaǵy jylý berý júıesinde problema bolmaýy tıis. Bul týraly Energetıka vıtse-mınıstri Suńǵat Esimhanov málim etti.

- El aýmaǵynda qalalardaǵy jylý berý ortalyqtarynda problema bolmaıdy dep oılaımyz. Bul rette, daıyndyqtarymyz aıtarlyqtaı jaqsy deńgeıde. Keıingi úsh jylda osy baǵytta qarqyndy jumys istep jatyrmyz. Qomaqty qarajat ta bólindi. Jylý-elektr ortalyqtaryn jóndeý jumystarynyń sapasy da artty, - dedi S. Esimhanov elordada kommýnaldyq sektorlardy jańǵyrtý taqyrybyndaǵy forýmda tilshiler suraǵyna jaýap bere otyryp.

Osy oraıda ol úsh jyl buryn Ekibastuzda jáne Rıdderde problema bolǵanyn eske saldy.

- Bul qalalardaǵy tozyǵy jetken ınfraqurylymdy aýystyrýǵa erekshe ekpin qoıylǵan. Atap aıtqanda, bıyl jylý berý maýsymy ýaqyty bastalady dep senemiz, ıaǵnı barlyq másele ornymen sheshilip jatyr, - dedi vıtse-mınıstr.

Budan buryn habarlanǵandaı, Úkimet basshysynyń orynbasary Qanat Bozymbaev «Energetıkalyq jáne kommýnaldyq sektorlardy jańǵyrtý» ulttyq jobasy aıasynda bes jáne odan da uzaq merzimdegi jumystardy júzege asyrý úshin 13 trln teńge qajet ekenin aıtty.