Qalalarda jeksenbi saıyn ortalyq kóshelerdiń biri sporttyq maqsatqa paıdalanylsa, salamatty ómir saltyn ustanýshylar sany artar edi - M. Saǵymbaev
ALMATY. QazAqparat - Eger elimizde qalalardyń ortalyq kósheleriniń biri jyl on eki aı, jeksenbi kúnderi jergilikti turǵyndarǵa sport alańy retinde beriler bolsa, salamatty ómir saltyn ustanýshylar sany arta túser edi. Bir jyl ishinde jer sharyn velosıpedpen aralyp shyǵyp, búgin týǵan qalasy - Almatyǵa oralǵan 27 jastaǵy saıahatshy Maǵjan Saǵymbaev óziniń osyndaı ıdeıasymen bólisti.
«Eýropa elderinde velosıpedke qatysty ınfraqurylymdar óte jaqsy damyǵan. Keıbir qalalarda tipti ortalyq kóshelerdiń birinde jeksenbi kúnderi kólik qozǵalysy toqtatylyp, ol júrginshiler júretin kóshege jáne sport alańyna aınaldyrylady. Mysaly, Kolýmbııanyń astanasy Bogota qalasynyń ortalyq kósheleriniń biri - Amazonııa dańǵylynda jeksenbi kúnderi kólik qozǵalysy sap tyıylady. Sodan adamdar tańerteń sol kóshege shyǵyp, boı jazyp, dene shynyqtyrý jattyǵýlaryn jasaı bastaıdy. Bireýler jaıaý serýen qurady, endi bireýler júgiredi nemese velosıped tebedi. Basqalar óz aýmaǵyn belgilep alyp, ár túrli oıyndar oınaıdy, bı bılep, án salady. Osylaısha kóshe keshke deıin turǵyndardyń qaraýyna beriledi»6 - dedi M. Saǵymbaev.
Onyń aıtýynsha Almatyda da osy ıdeıany júzege asyrýǵa ábden bolady.
«Adamdardy qur sózben sportpen aınalysýǵa májbúrleı almaısyń ǵoı. Sondyqtan qalamyzda jeksenbi kúnderi sporttyq maqsatta ortalyq kóshelerdiń biri turǵyndardyń qaraýyna beriler bolsa, onda qalamyzda salamatty ómir saltyn ustanýshylar sany arta túser edi. Bul buqaralyq sporttyń qaryshtap damýyna septigin tıgizedi. Óıtkeni adamdarǵa aqsha tólep alysqa barmaı-aq, esiktiń aldyndaǵy kóshege shyǵyp-aq qalaǵanynsha boı jazý, kóńil kóterý óte tıimdi»6 - dedi M. Saǵymbaev.
