Qalalarda mektep salynbaǵan aýdandarda turǵyn úı qurylysyna tyıym salynady

ASTANA. QazAqparat – Májilis depýtaty Ashat Aımaǵambetov qalada mektep salynbaǵan aýdandarda kóppáterli turǵyn úı qurlysyna tyıym salý tártibin qarastyrǵan zań jobasy ázirlengenin aıtty, dep habarlaıdy QazAqparat tilshisi.

«Mektepterdegi oryn tapshylyǵyna baılanysty jaǵdaıdy aıtatyn bolsaq, úsh aýysymda oqytatyn mektepterdiń sany aıtarlyqtaı azaımady. Bul turǵyda megapolısterimizde turǵyn úı qurylysy qarqyndy júrip jatqanymen, bul ýchaskelerde daıyn áleýmettik ınfraqurylym joq desek bolady. Qarqyndy qurylys bastalǵan aýdandarda balalar úsh aýysymda oqyp jatyr. Biraq mundaı kópqabatty turǵyn úılerdi salýǵa ruqsat bergende, ákimdiktiń mundaı naqty máselelerdi eskermegeni balalardyń kinási emes. Sondyqtan depýtattar tıisti zań jobasyn daıyndap, qujatty Úkimetke jiberdik», - dedi Ashat Aımaǵambetov Májilistiń jalpy otyrysynan keıin tilshiler suraǵyna jaýap bere otyryp.

Onyń aıtýynsha, zań jobasynda daıyn mektepter men balabaqshalar joq jerde kóppáterli turǵyn úıler salýǵa tyıym salý qarastyrylǵan. Sonymen qatar, belgili bir aýdanda tek bir aýysymda oqytatyn mektep bolsa ǵana sol jerde turǵyn úı salýǵa ruqsat berilýi tıis.

«Bul máseleni eskerý kerek. Mektepterdi sala berýge bolady, biraq qalanyń keıbir jerinde mektep qurylysyna múldem jer telimi qarastyrylmaǵan. Ata-analar ózderiniń turǵyn úıinen 10-15 shaqyrym jerde ornalasqan mektepke balasyn kúndelikti tasymaldaı almaıdy ǵoı?! Sondyqtan osy salada qordalanǵan problemany júıeli túrde sheshý kerek», - dedi depýtat.