Qalalar arasynda ushý úshin anyqtama qajet pe
NUR-SULTAN. QazAqparat - 1 mamyrdan bastap Qazaqstan qalalary arasynda áýe tasymaldary qaıta jandanyp keledi. Osy oraıda jolaýshylar «basqa qalaǵa ushý úshin jumys ornynan, ákimdikten anyqtama, tirkeý qajet pe, emdelý, qydyrý, jumys syndy ushý sebebin kórsetemiz be?» dep suraǵan edi. «Air Astana» áýe kompanııasy bul suraqtarǵa jaýap berdi, dep habarlaıdy QazAqparat.
«Eger qala karantınge jabyq bolmasa, jolaýshylar emin-erkin bılet alyp, usha alady. Ol úshin eshqandaı anyqtama talap etilmeıdi. Koronavırýs ınfektsııasyna PTR test tapsyrý talaby da 11 mamyrda alynyp tastaldy. Biraq, qorǵanys betperdesin kııý, áýejaıdaǵy áleýmettik qashyqtyq jáne dene qyzýyn ólsheý sharalary kúshinde qalady», - dep jaýap berdi áýe kompanııasynyń baspasóz qyzmeti.
Kompanııa barlyq rásimderdi oryndaý úshin jolaýshylardyń ushýdan 2 saǵat buryn áýejaıǵa kelýi kerektigin aıtty.
«Ushaq bortyndaǵy taǵam bir rettik ydys-aıaqta beriledi. Tamaqtanǵan soń jolaýshylar qaıtadan betperde kıip, reıs boıy taǵyp otyrý tıis.12 mamyrdan bastap «Air Astana» Qazaqstannyń basqa qalalarynda ashylyp jatqan áýejaılarda ishki baǵyttar jelisin qalpyna keltire bastady. Barlyq ózekti aqparatty jolaýshylar resmı saıtymyzdan nemese áleýmettik jelidegi paraqshalarymyzdan bile alady», - deıdi áýe kompanııasy.
