«Qalaǵa jetý muń boldy»: ShQO-daǵy Zaısan aýdanynyń turǵyndary jol jaǵdaıyna shaǵymdandy
ÓSKEMEN. KAZINFORM – Shyǵys Qazaqstan oblysy Zaısan aýdanynyń turǵyndaryn joldyń múshkildigi ábden qajytqan. Ásirese kóktem-kúz aılarynda kólikter balshyqqa batyp qalyp, aýyldardan Zaısan qalasyna jetý tipten qıyndaıdy. Kazinform tilshisi máseleniń mánisine úńilip kórdi.
Jergilikti halyqty jaǵdaıy syn kótermeıtin Birjan-Aqaral joly sharshatqan.
- Qys ketip, qar erigende jáne jylaýyq kúzde jol balshyqqa aınalady. Sonyń saldarynan aýyldardan Zaısan qalasyna jete almaı, sergeldeńge túsemiz. Birde tipti turǵyndardyń biri jedel járdem shaqyrtqanda olar jete almaı qalǵan. Osy máseleni ákimdikke talaı jyldan beri aıtyp kelemiz. Alaıda «baıaǵy jartas – sol jartas» bolyp tur, - deıdi zaısandyqtar.
Kazinform tilshisi Zaısan aýdanynyń ákimdigine resmı saýalhat joldap, joldyń jóndeletindigin-jóndelmeıtindigin naqty surap kórdi.
- Atalǵan tasjol aýdandyq turǵyn úı-kommýnaldyq sharýashylyǵy, jolaýshy kóligi jáne avtomobıl joldary bóliminiń balansynda. Jalpy Birjan aýylynan Aqaral aýylyna deıingi qashyqtyq 12 shaqyrymdy quraıdy. Jol jazǵy kútip-ustaý jumystary aıasynda normatıvtik qalypta ustalýda. Al ortasha jóndeý jumystaryn júrgizý 2025 jylǵa josparlanyp otyr. Turǵyndar tarapynan da qalpyna keltirý jóninde usynystar kelip tústi, - dep jaýap berdi aýdan ákiminiń orynbasary Danııar Serikov.
Onyń aıtýynsha, bıyl Tasbastaý aýylyndaǵy kóshe 61,7 mln teńgege ortasha jóndeýden ótedi. Aınabulaq aýyldyq okrýgindegi 9 kósheni de ortasha jóndeýden ótkizý josparlanyp otyr.
- Joba somasy - 210 mln teńge. Birjan aýylynyń 19-mamyr, 8-Shartty, Amangeldi, 4-Shartty kóshelerin ortasha jóndeý jobasy qolǵa alynady. Jalpy uzyndyǵy - 1,806 shaqyrym. Joba somasy 80 mln teńgeni quraıdy. Daıyr aýylyndaǵy Abaı kóshesi 58 mln teńgege ortasha jóndeýden ótedi. Sondaı-aq Kókjyra aýylynyń eki kóshesine ortasha jóndeý júrgiziledi. Qarabulaq aýylyndaǵy Abaı kóshesin ortasha jóndeý úshin 69,6 mln teńge kózdelgen, - dedi Danııar Serikov.
Sondaı-aq osy jyly aýdandyq mańyzy bar «Zaısan-Jańaturmys-Shúrshitsý» (0-12 shaqyrym) tasjolynda ortasha jóndeý jumystary júrgiziledi.
Eske salsaq, buǵan deıin Shyǵys Qazaqstanda joldy sý shaıyp ketken bolatyn.