Qalaǵa til tıgizgen boıjetken 6 jylǵa bas bostandyǵynan aıyrylýy múmkin
ASTANA. QazAqparat - Djokıakarta qalasyna til tıgizgen ındonezııalyq stýdent qyz 6 jylǵa túrmege toǵytylýy múmkin. Boıjetken áleýmettik jelilerge qalany mádenıetten jurdaı, kedeı dep jamandaǵan kórinedi.
Jergilikti BAQ-tyń jazýynsha, 26 jastaǵy boıjetken janarmaı stantsııasynda kezekke turǵysy kelmeı, kezeksiz ótip ketpek bolady. Alaıda stantsııa qyzmetkerleri onyń bul áreketin baıqap qalyp, qyzmet kórsetpeı qoıǵan.
Atalǵan oqıǵa stýdent qyzdyń shamyna tıgeni sonshalyq, ol óz emotsııasyn áleýmettik jelilerde bylaısha jarııalaıdy: «Djodja (Djokıakarta) - halqy óte kedeı jáne dóreki, mádenıetsiz qala. Djakarta men Bandýng ( Indonezııa qalalary) qalasyndaǵy dostarym, ótinem, Djodjaǵa kelmeńder». Sondaı-aq ol áleýmettik jelilerdiń birine vıdeo jarııalaǵan, bul jerde de unamaǵan qalaǵa shaǵym aıtqany kórsetiledi.
Bul vıdeo ǵalamtor paıdalanýshylardyń arasynda tarap, qyzdyń jazǵanyna ashýlanǵan jergilikti turǵyndar polıtsııaǵa shaǵymdanady.
Kóp uzamaı 26 jastaǵy Florentsııa Sıhombın qalaǵa til tıgizip, shý týdyrǵany úshin aıypty dep tanylyp, qamaýǵa alyndy. Qalalyq polıtsııanyń baspasóz hatshysynyń aıtýyna qaraǵanda, boıjetkenniń kinási dáleldengen jaǵdaıda ol 6 jylǵa bas bostandyǵynan aıyrylýy múmkin, dep jazady sheteldik BAQ.
