Qalaǵa tarıhı tulǵalardyń esimin berý tájirıbesi bar

ASTANA. QazAqparat - «NUR-Medıa» xoldıngi bas dırektorynyń orynbasary, QHA «Jańǵyrý joly» jastar qozǵalysynyń tóraǵasy Maksım Spotkaı Astananyń ataýyn ózgertý protsedýrasy jóninde pikir bildirdi, dep habarlaıdy QazAqparat.

«Qazir qoǵamymyzda talqylanyp jatqan eń ózekti máselelerdiń biri - elordanyń qaıta atalýy. Nursultan Nazarbaev Táýelsiz Qazaqstannyń tuńǵysh Prezıdenti, laıyqty saıasatker dep esepteımin. Bul - álemdik tájirıbe, álemniń kóptegen elderi men qalalaryn uly saıasatkerlerdiń qurmetine ataǵan. Vashıngton, Sankt-Peterbýrgten bólek, óz elimizde Sátpaev, Jambyl qalalary bar. Bul ataýlar sol qalalardyń damýyna úlken úles qosqan tulǵalardyń qurmetine berilgen. Demek, bul tájirıbe bizde de qoldanylady», - dedi Maksım Spotkaı.

Onyń aıtýynsha, Elbasy - elorda ataýyn ózgertýge laıyqty tulǵa.

«Elbasy Astanany óz bastamasymen usyndy, óz sheshimimen Saryarqaǵa kóshirdi. Bul da kezinde tarıhı sheshim dep baǵalandy. Osylaısha, 20 jylda Elbasynyń saıasatymen Uly dalamyzdyń tórinde jańa qala boı kóterdi. Negizin qalaýshy - sózsiz Tuńǵysh Prezıdent. Sondyqtan, elorda ataýyn berýge Elbasy laıyqty dep esepteımin», - dedi M. Spotkaı.