Qalaǵa qosylǵan eldimeken turǵyndary derbes shotty qalaı ashady – Almaty ákimdigi
ALMATY. QazAqparat – Almatyǵa jaqynda qosylǵan eldimekemenderdiń turǵyndary elektr energııasyna shamadan tys qymbat aqsha tólep keledi. Olardyń máselesi jaqyn arada sheshiletin boldy.
Bul týraly Almatyda ótken brıfıng barysynda qalalyq Energetıkalyq tıimdilik pen ınfraqurylymdyq damý basqarmasynyń basshysy Áset Masabaev aıtty, dep habarlaıdy QazAqparat tilshisi.
Onyń aıtýynsha, qala ákimi Baqytjan Saǵyntaevtyń tapsyrmasymen jańadan qosylǵan eldimekenderdi elektr qýatymen sapaly qamtamasyz etý qolǵa alynǵan. «Táýelsizdik alǵaly beri 30 jyl aralyǵynda saıajaı turǵyndary óz kúshimen elektr jelilerin júrgizip, transformator qoıǵan. Biraq qazir onyń barlyǵy eskirdi. Transformatorlar jekelegen mekemeler men kásipkerlerdiń atynda bolǵan. Tarıfter ártúrli boldy. Osy máseleni sheshýdi Baqytjan Saǵyntaev tapsyrǵan bolatyn. Aldyńǵy jyly «Alataý Jaryq Kompanııasy» AQ birlese otyryp, 544 mekenjaı boıynsha elektr jelisin kommýnaldyq menshikke qabyldadyq. Onyń ishinde 164 transformator, 756 elektr jelisi bar», - dedi ol.
Basqarma basshysy jeke derbes shot ashýdyń tártibin de túsindirip ketti.
«Biraq azamattarymyzǵa túsinikti bolýy úshin kelesi sharttardy oryndaý kerek. Derbes esepshot ashý úshin tehnıkalyq shart alýǵa tıispiz. Tehnıkalyq shart alý úshin ár tutynýshyda óz esepteý quraldary, úıdiń janyndaǵy baǵandaǵy elektr jelilerin (3 metr 10 metr arasynda) aýystyrý jańartý talaptary bolady. «Almaty jaryq kompnaııasy» AQ baǵynatyn 7 aýdanda 7 mekeme bar. «AJK» AQ resmı saıtynda barlyq málimet tur. Solardyń mekenjaıyna habarlasa otyryp, aryz jazyp, 5 kúnnen soń tehnıkalyq shart alasyzdar. Ony oryndaǵan soń «AJK» AQ barlyq qujatty «Almaty EnergoSbyt» AQ aýdaryp, jeke shot ashady. Sodan soń saıajaı turǵyndary da elektr energııasyn 17 teńgelik tarıfpen tóleı bastaıdy», - dedi ol.
Buǵan deıin qala ákimi Baqytjan Saǵyntaev ıesiz jatqan elektr jelileri men transformatorlardy qala balansyna alý týraly tapsyrma bergen bolatyn.
