Qalaǵa kelgen birde-bir stýdent baspanasyz qalmaýy tıis – Premer-Mınıstr
ASTANA. KAZINFORM — Ǵylym men tehnologııalardy keńinen tanymal etý jónindegi keshendi jospar qabyldaý kerek. Bul týraly Úkimet otyrysynda Premer-Mınıstr Oljas Bektenov aıtty.
«Joǵary bilim berý salasyna toqtalsaq, ulttyq joǵary oqý oryndarymyz ben jetekshi sheteldik ýnıversıtetterdiń fılıaldary baǵyt berip otyrýǵa tıis. Ǵylym mınıstrligi jumys nátıjeleri boıynsha fılıaldarǵa qoıylatyn talaptardy ázirlegeni jón. Saraptamalyq keńes quryp, barlyq ýnıversıtetterge qoıylatyn talaptardy olardyń álemdik standarttarǵa sáıkestigi turǵysynan qaıta qaraý qajet. Joǵary oqý oryndary kásiporyndarmen tyǵyz jumys isteýge tıis. Stýdenttik, magıstrlik jumystardyń el ekonomıkasy úshin naqty nátıjesi bolýy kerek», - dedi Oljas Bektenov.
Úkimet basshysy Ǵylym jáne Oqý-aǵartý mınıstrlikterine Ǵylym men tehnologııalardy keńinen tanymal etý jónindegi keshendi jospar qabyldaýdy tapsyrdy.
«Jataqhanalardaǵy oryn tapshylyǵy ózekti másele sanalady. Syrttan kelgen birde-bir stýdent baspanasyz qalmaýǵa tıis. Óńir ákimderi, Oqý-aǵartý jáne Joǵary bilim mınıstrleri aıtylǵan máselelerdi jeke baqylaýǵa alsyn. Barlyq bilim berý obektileri oqý jylynyń bastalýyna 100% daıyn bolýy tıis», - dedi Premer-Mınıstr.
